Ken ta responsabel pa e situashon lamentabel di infekshon ku ta reina

WILLEMSTAD. Den kuadro di e situashon ku ta birando agudo riba tereno di infekshon di Covid 19 i mirando e ola di kasonan ku a oumentá e último simannan, frakshon di MAN a hasi algun pregunta na promé minister den su ròl komo Opperbevelhebber. Pasobra ta importante pa pueblo ta na altura kiko Gobièrnu a hasi pa salbaguardiá salú di su empleadonan i garantisá kontinuashon di servisio na pueblo pa motibu di COVID. Minister presidente Pisas por indiká kiko ta e impakto pa ku e servisio ku mester duna na komunidat i kuantu sèn esaki a kosta komunidat. Ken ta responsabel pa e situashon lamentabel ku ta reina dor di falta di un maneho i falta di antisipá riba e ola di COVID di e último simannan aki.
Frakshon di MAN ta konstatá ku den tur ministerio i departamentonan vital manera kuerpo polisial ,dosentenan, ontvanger, brantwer, ambulans, Ministerio di SOAW , Ministerio di GMN, Duana i otronan ta bou di preshon enorme pa motibu ku tin un gran kantidat di personal malu na kas.
Kiko tabata maneho di Gobièrnu pa evitá e kontakto i kontagio na boka di trabou. Un kontesta ku tur hende ta interesá pa tende ta si minister Pisas por indiká kuantu ámtenar a mèldu malu pa ku e pandemia di COVID. I ki impakto ekonómiko esaki ta tin pa sektor priva i pa Gobièrnu su entradanan ku nan a pronostiká.