Ken dje 244 interesadonan ta bin na remarke pa bira doño di tereno na Gato

WILLEMSTAD. Dos siman pasá mr. P.E. de Kort kende ta e wes ku a keda apuntá pa asigná kuantu dje 244 hende ku sea ta okupando un pida tereno kaba na Gato of ta aspirá di haña pida tereno lo por haña tende kon a sigi ku e proksimo kapitulo di e terenonan na Gato ku katibunan a muri laga atras sin reparti.

UNDA GATO TA?
Gato e tereno ku ta keda sur di Weg naar Westpunt, nòrt di Hato, ost di Souax i west di Papaya i ku ta registrá komo Malpais-Gato ku ta registra ku un grandura di 86 hektar ku ta riba nomber di herederonan di difuntu viuda Rasveldt-van Uyrecht 89,59 hèktar ku ta riba nomber di e katibunan di viuda Rasveldt-van Uytrecht kende a fayesé na aña 1811 segun e karta di Domein di 1974.
Stichting Belangenbehartiging terreinen Hato ku abogado mr. R.E.F.A. Bijkerk ta maneha e fundashon i ta kondusiendo e kaso den korte pa e herederonan huntu ku Stichting Belangenbehartiging di herederonan di Sybrecht van Uytrecht i 32 otro interesado na Kòrsou i na Hulanda kendenan tin mr. Larmonie komo abogado na Kòrsou i na Hulanda.
Mr. Vierbergen ta representa 32 interesado na Kòrsou i na Hulanda. Gobiernu di Kòrsou tambe a reklama pida tereno dje teritorio.
E lista di 244 interesado ta riba e portal di Korte di Hustisia.
For di 2019 ku e kaso a bai korte a tene diferente seshon kaba te ku aña pasa yuni 2022 ku a tende testimonio di Kadaster.
Resumiendo tur e datonan aki korte a tuma un desishon intermedio pa reanuda e desishon ku a tuma dia 7 di yuni 2019 pa traha un plan di repartishon pa Gato meskos ku gobiernu a hasi ku Rancho i Vetter.

Sinembargo den e kaso di Gato gobiernu no a traha un plan di repartishon i no tin indikashon ku nan tin intenshon di hasi esaki tampoko loke ta hasi ku ta praktikamente imposibel pa un notario duna interesadonan individual pèrmit pa kumpra, alkilá of haña erfpacht na interesadonan individual.
Dia 19 di mei korte a anunsia ku lo konsiderá hasta ki grado lo por asigná of bende tereno ku siudadanonan interesá sin kontribushon di gobiernu pero dia 10 di yuni 2021 gobiernu a bisa kaba ku por dal bai ku repartishon of venta dje terenonan.