Kastigu kombiná di 30 aña prezu pa pareha pedofil na Sint Maarten

PHILLIPSBURG. E pareha di pedofil ku ta biba na Sint Maarten, Bernard Stroud i Joy Walters a risibi un kastigu di prizon kombina di 30 aña.
E muhé kende tabata sekretaria di skol primaria i siendo kasá, e tabatin un relashon amoroso ku Stroud, a haña e kastigu mas fuerte ku fiskal a pidi ayera mainta.
Fiskal a pidi 10 aña di kastigu pa Joy Walters i wes a konsiderá e muhé un perverso kende na lugá di hunga ròl di viktima tabata baha riba su viktimanan manera bestia feros i wes a kondené na 13 aña di kastigu di prizon.
E viktimanan tabata mucha muhé chikitu di entre 5 i 11 aña ku e pareha tabata violá i abusá seksualmente den kas di Stroud kende su kasá tabata kómplise den e kaso.
Joy Walters tabata biba den e mesun kaya kaminda e muchanan tabata bai skol na Belvedere.
Walters tabata ‘kuida’ e muchanan na su kas despues di skol of anochi i tin biaha e tabata laga nan pasa anochi den su dormitorio.
Otro biaha e tabata hiba e muchanan pa Stroud i su kasá ku kende Joy Walters tabatin un relashon amoroso pa años.
Di akuerdo ku e abogadonan di Stroud i Walters, loke e muchanan a konta polis ta mentira.
E abogadonan a kuestiona si tin prueba ku Stroud i Walters di loke e muchanan a konta.
NO TIN TESTIGU
Wes na su turno a komentá ku den kasonan di violashon seksual mayoria biaha no sa tin testigu manera den e kaso aki.
Ta p’esei pa kumpli ku e regla minimo di prueba deklarashon dje viktima no ta sufisiente pa haña prueba.
I si e akusado ninga e akusashon, Korte mester haña sufisiente respaldo den otro prueba.
I ounke Stroud a ninga semper ku e ta kulpabel wes a haña ku tin sufisiente prueba sirkunstansial ku ta respaldá e akusashon.
Pero a muchu straño ku tur e viktimanan a konta mesun kuenta dje mesun aktonan, dje lugá kaminda a abusá di nan, e tempu i kon Stroud a changa nan ta indiká e mesun modus operandi.
Foto: The Daily Herald