Kastigu di 12 luna presu pa Mama di 4 yu na Ulanda ku a kobra € 197.495,- ilegal

WILLEMSTAD. Dos siman pasá un tribunal na Rotterdam a dikta un kastigu di 12 luna di prison pa un señora ku 10 aña largu (!!) a falsifika dokumento di belasting ku kual ela kobra kasi 200.000 florin Kurasoleño supuestamente pa kompletá pago pa kuida su 4 yunan na institutonan di mucha chikitu pero ta ku dokumento falsifika ela kobra e sèn na servisio di Belasting.
Dos siman pasá korte a trata e kaso kaminda Ministerio Publiko a akusá un señora di fam Michel di a kohe nan kabes’abou dies aña largu pe montante ku konverti na florin di Kòrsou ya ta kasi 400.000 florin.
E kos aki manera nan ta bisa na varnakulo, no ta yu di mama sino ‘tribu di mama’ por a kria ku sèn ku Servisio di Belasting a pag’é.
Korte a kondená e señora pa falsifikashon di dokumento i labamentu di plaka ku a meritá un kastigu di 12 luna.
Mañan ta hasi un luna ku wes a atendé e kaso i dikta sentensia mesora.
Servisio di Belasting a konsedé e señora e kompensashon ya menshoná pasobra ela hañ’é ku forsa retroaktivo. Fiskal a haña e kaso asina grave ku ela pidi 14 luna di kastigu di prisòn pasobra ta un estafa del carajo e señora a kometé.
Belasting ta paga e kompensashon aki pa promové i stimulá mayornan kombiná trabou pafó di kas i alabes paga pa kuida yu. E kompensashon yama Wet Kinderopvang (WKO).
Uniko kos ku e mama mester hasi ta laga un instansia pidi pa e yu bai un kinderopvang legal of sigi un trayekto di reintegrashon di ta hende ku tin un kondena i firma pa e kantidat di oranan ku e nan tin ku bai e sentro.
Servisio di Belasting ta duna e mayor un Toeslag ku nan por haña hasta ku forsa retroaktivo i ora aña bòltu e ta sigi kore outomatikamente.
I mas importante ainda, no tin nodi pa pidi un pèrmit nobo pasobra esun koriente ta sigi válido.
Ta solamente si salario dje señora kambia e tin ku registrá esaki ta un formulario ku e ta manda pa Belasting.
No ta kontrolá tur petishon sino ta tene ‘steekproef’.
Den e kaso aki wes a konstatá ku e formulario ku e señora a usa tabata falsifika. Otro ku a hala atenshon di Belasting a konstata ta ku di e sèn ku nan a pone riba su kuenta e no a paga e sentronan infantil.
E señora no por a ninga ku te mes a falsifika e formularionan pa kobra e ayudo sosial.
E no tabatin kómplise pasobra su kasá Michel no a pasa ni banda dje papelnan.
E manera ku e señora a haña sèn di belasting ta mediante froude ku ta un delito pasobra e no tabatin derecho riba e sèn.
E muhé tabatin tur formulario di banko loke a fasilitá pa Belasting saka sòm dje froude.
Duarte 10 aña e señora a hunga e wega aki i a kobra 197.495,- euro i posiblemente mas i awor e tin ku paga pe eror aki ku su libertat.
Wes a tuma e señora masha na malu loke ela hasi pasobra ela abusá si un sistema ku gobiernu a lanta pa mayornan por a sigi traha i gobiernu ta paga pa kuida nan yunan.
Den e kaso aki Belasting a konfia riba e datonan ku e señora a duna i ela kue nan kabes’abou.