Kaso dos morto den trafiko ta bira rompekabesa pisá!

WILLEMSTAD. E kaso di e aksidente riba Schottegatweg Noord kaminda dos obrero a pèrdè nan bida ora ku un outo Mercedes manehá pa un shofur di 21 aña a praktikamente katapultá nan bai tira nan den kurá di un kas di famia.
E kaso lo bira un rompekabesa pisá pasobra diferente eksperto a duna varios vershon kaba riba e suseso menos wes ku tin ku husga e kaso na final
E shofur ku a alkansá e dos viktimanan ta e hoben D. Kleijn di 21 aña kende segun komentario di esnan ku no a mira e aksidente pero a rekonstrui e aksidente a base di nan eksperensia profeshonal, a yega ne konklushon ku ta direpente e hoben a hañ’é konfrontá ku un pikòp riba su ruta i no por a desviá.
Di akuerdo ku nos kolaborador espesial ku tabata ne sitio direktamente despues dje aksidente, despues ku polis a interogá e hoben den kompania di su abogado kende a konvensé outoridatnan ku no por tene su kliente pa asesinato of morto kulposo pasobra ta un aksidente a pasa.
Nan a kita e shofur su reibeweis i a lag’é liber pero kedando na disposishon di outoridatnan.
Polis su prome reakshon tabata ku e suseso mortal ta un situashon fèrfelu i siguridat tambe ta forma parti di totalidat kaminda ku trabou ta tuma luga riba kaya.
Tin indikashon ku ora tin trabou riba kaya of kantu di kaminda no ta pone bòrchi di atvertensia na tempu sigur no kaminda tin shofur ta kore duru.
Polis tin outoridat pa koregí e situashon pero esei akaso nunka ta sosode pasobra manera djasabra un outo di polis mester a pasa mira e trabou pero no a intervení.
Pió ainda ku despues dje aksidente a pasa bon ratu ku polisnan unifòrm a presenta i ta un polis na sivil a purba alehá e hendenan for di e sitio dje desgrasia.
Mientras kachó ku pushi tabata kana trapa riba pistanan ku polis lo mester usa pa rekonstrui e aksidente.
Awe mainta trabou tabata sigi normal manera nada a pasa.
KEN TA
RESPONSABEL?
E abogado di e hoben shofur ta Olga Kostrzewski kende a kompaña su kliente tur momento te ora ela sali liber.
Su punto ta ku no tabata morto premeditá debi ku ta sali for di e punto di bista ku niun hende no ta sali nan kas pa dal niun hende mata ku outo.
Kleijn a sali atmiti su kulpabilidat i esaki por a tuma nota tambe ku Kleijn tabata den shòk despues di e aksidente.
Pa loke ta responsabilidat material dje kaso, aki ta hasi menshon di tres partido ku ta e kompania matris ku a ordená e limpiesa kantu di kaminda, polis ku no ta kontrolá si nan ta traha bou di sirkunstansia di siguridat i e sup kontratista ku a kontrata e dos viktimanan. Nan tambe tin ku bin dilanti pa responsabilisa nan parti pasobra no por manda dos hende sin paña ku ta identifika nan komo obrero ku ta traha kantu di kaminda.
Pero Kleijn ta keda den disponibilidat pa OM pa asina e por presentá na momento ku esaki ta nesesario.
Nos kolaborador a sigui ku un investigashon i tin algun faktor ta hunga un ròl den e aksidente aki. Kleijn no por tabata kore bou di 100km pa ora.
E bògt ta unu ku ta yama flauwe bògt.
Ora ku Kleijn a hañ’e ku e bòrchi diripiente pa falta di eksperensia Kleijn no tabata tin e kurashi i eksperensia pa e por a domina e stuurwiel di e outo.