Kaso di sikarionan profeshonal na Sint Maarten awe mèrdia den Korte

WILLEMSTAD. Awe mèrdia den un sala di korte super proteha ta kuminsa e kasonan di apelashon di e ‘hitman’ di e organisashon kriminal No Limit Soldiers ‘NLS’ pa tres likidashon na Sint Maarten i diferente intento di asesinato.
E sospechoso prinsipal ta Shavilla ‘Heart’ Parris kende ta sintando un kastigu di bida largu.
Hustisia ta kere ku Parris tin laso ku e organisashon kriminal No Limit Soldiers.
Korte a haña Parris kulpabel kaba di asesinato riba Ishmael Brumant i T. Bass na aña 2019, di asesinato di Jonathan Williams 2018 i intento di asesinato di komo sinku persona mas.
Hustisia tin grabashon di 28 oktober 2019 kaminda por mira dos homber armá ku pistol den man ta kore drenta un mini-market na Middle Region (Sint Maarten) kaminda Brumant tabata sinta kombersa ku tres otro homber. Nan a mata Brumant i a heridá tres otro viktima.

E otro pistolero ku tabata maskará a slep dal abou pasobra awaseru a kai i e tiru ku a sali a alkansa Bass kende a muri un ratu despues.
Mientras tantu e otro pistolero a kore tras dje otro hòmbernan ku e no por a tira pero finalmente a hañ’é ta bati retirada den un Kia blanku.
Korte a haña ku a proba ku ta Parris tabata e pistolero maskará i a haña prueba importante den forma di un pistol Glock 17 ku nan a uza den e tiroteo i despues den otro intento di asesinato na yanuari 2020.

JONATHAN
WILLIAMS
Dia 5 di ougustus 2018 e asesinonan a pone trampa pa Jonathan Williams na Sint Maarten i a tir’é mata den su outo na Simpson Bay despues di un paranda henter anochi.
Ora Williams kier a bèk sali ku su outo nan a forma un blokeo i un homber maskará ku tabata sintá den e outo i a tira Williams tres biaha den su kabes pa despues hui via parti franses.
Nan a haña e outo despues di dos siman den French Quarter ku prueba di DNA di Parris.
Durante e proseso fiskal a deklara ku Parris i su kómplisenan a forma un ekipo di asesino profeshonal.
Polis tin informashon ku Parris tin laso ku e miembro di No Limit Soldiers Irvin “Nuto” Wawoe i tabata traha pe komo sikario. Wawoe a biba un tempu na Sint Maarten kaminda nan a asesina su kompañera di bida pero Wawoe mes a skapa di un intento di asesinato den prizon na Sint Maarten.
Abogado Yehudi Moszkowicz ta atendé e kaso den apelashon i ta kere ku e por saka Parris liber.
Korte a reserva tres dia pa trata e kaso.