Kas di Kòrsou tambe ta deskonsehá studiante sin bibienda bai Hulanda

WILLEMSTAD – Despues di Kas di Aruba, awor ta Kas di Kòrsou ta bati alarma, relashona ku e skarsedat di bibienda pa studiantenan na Hulanda. Luna pasa Arubahuis a indiká ku ela risibi informashon serka varios mentor ku hopi studiante ku ta bayendo Hulanda no ta dispone di un kamber òf un otro tipo di bibienda. E situashon aki ta motibu di preokupashon pa Arubahuis. Sinembargo Glenda Hernandez direktor di Arubahuis a indika ku Arubahuis no por regla bibienda pa studiantenan ku ta bai Hulanda.
Den kaso ku e studiante no tin un kaminda pa biba ora ku e yega Hulanda, Arubahuis ta deskonsehá e studiante arubano pa bai Hulanda, te ora ku e tin perspektiva pa un adres fiho.
Den deklarashon ayera pa Tele Curacao, minister plenipotensiario di Kòrsou na Hulanda, Carlson Manuela a tambe a menshona ku tin skarsedat di bibienda na Hulanda. Manuel ta bisa ku e studiantenan ku ta bai Hulanda bou di guia di SSC, ta haña un kamber, pues esei no ta problema. E bibienda ei ta disponibel durante 11 luna i mei i despues e studiante mes mester buska un otro bibienda. Ta pesei ta konsehabel segun Manuel, pa for di Korsou e studiante ku ta prepara pa bai Hulanda, mester kuminsa inskribi komo buskadó di kas. Esaki ta hasi e posibilidat mas grandi pa e studiante, ora ku yega tempu pa e sali for di e kas ku SSC a buska pe.
E minister plenipotensiario a referi tambe na e asina yamá ‘’free moversnan’’, e studiantenan ku ta bai Hulanda riba nan mes. Pa e grupo aki e situashon ta fèrfelu, pasobra e studiantenan aki ta skoge pa biba serka famia. Manuel: ‘’E sistema di biba na Hulanda ta pone ku e famianan por pidi e studiantenan diripiente pa sali for di kas. Esaki pasobra e famia por pèrde sierto previlegio. ‘’Si bo no tin un luga pa bo keda, mi ta konseha no bin. Paso bo ta haña bo na kareda mei mei di bo journey komo studiante’’. Esei tabata ekspreshonnan enfátiko di minister plenipotensiario Carlson Manuel.
Aktualmente Kas di Kòrsou ta den proseso pa habri un Departamentu pa Studiante.
Carlson Manuel a menshoná ku un departamentu asina por duna mihó sosten na e studiantenan di Kòrsou. Institushon di e Departamentu pa Studiante, ta forma parti dje kambionan di struktura di Kas di Kòrsou.
Aktualmente tin algun trahadó di Kas di Kòrsou ku tin hopi afinidat ku studiantenan i nan tin konosimentu kon regla sierto asuntu pa e studiantenan. Den e kuadro ei, si e hoben tin un problema, e por yama kas di Kòrsou. E trahadónan di e Kas ta disponibel a duna e yudansa ku ta den nan alkanse. ‘’Nos no por duna sen, nos por yuda ku kontakto i indikashon na unda mester bai’’. Asina minister plenipotensiario Carlson Manuel, a bisa finalmente.