Kapèl di Hospital ta bira espasio independiente

WILLEMSTAD. Semper ku tabatin diskushon kiko por hasi ku Sint Elisabeth Hospitaal dia ku Hospital Nobo habri, un dje mayó preokupashonnan tabata: kiko lo bai pasa ku e kapèl di Hospital?
E kapèl tabata kurason dje hospital for di tempu ku Iglesia Katoliko a lansa e inisiativa pa traha e hospital i semper e tabatin su kapelan.
Ta den e modernisashon ku lo bai tuma lugá no a laga espasio pa kapelan i e ultimo ku tabatin a retorná pa Colombia luna pasá.
Den e plan nobo si e bira realidat, e kapèl lo bira un ‘insitituto’ riba su mes ku publiko i e ruta ku publiko mester kana pa yega ne kapèl ta via un kaminata riba dak di e garashi di SEHOS.
Loke ta konosí komo Ben Smit Gebouw ta bira base pa un filial di un museo internashonalmente konosí i si ta posibel e lo bira e museo internashonal pa henter Karibe.
Ademas ku por konverti e edifisio komo un sentro korporashonal pa empresanan i gobiernu.
E ambishon sinembargo ta pa lanta un museo den e edifisio pasobra e lo ta interesantisimo pa turistanan ku baha for di barku na Pir i kana drenta Otrobanda via Sehos.
Asina pasa e porta tin un patio grandi kaminda tin plan pa habri un hotel estilo tropikal i den e patio mes lo krea un hardin ku pisina riba kual tin bista for di tur kamber.
Piso plano kaminda awor’aki tin e entrada monumental di Sint Elisabeth Hospital lo tin restorant ku un Grand Café ku terasa, restorant i sala di konferensia.
E promé piso lo keda konverti den ofisinanan chikitu.
Sint Thomas College i e edifisio prinsipal di Sint Elisabeth Hospital lo bira espasio pa vivienda na midí.
Planifikadónan dje proyekto a traha riba e plan pa transforma i re-desaroya e kompleho di Sint Elisabeth Hospital pero prinsipalmente pa krea un oportunidat grandi pa Otrobanda Sali padilanti tantu finansieramente komo funshonal.
E por nifiká un chèns ekselente pa bario di Otrobanda i turismo en general si ehekutá e Masterplan totalmente.

E outornan dje plan ta boga pa ehekut’é integralmente ku kurashi i liderasgo.
E por kambia Otrobanda kompletamente den sentido positivo. Mañan nos lo a elaborá riba e aspekto finansiero dje Masterplan pa Otrobanda.