Internashonal
Kandela den prizon na Colombia a laga un saldo 51 morto i 30 herido
BOGOTA – General Tito Castellanos direktor di e prizon ku yama Inpec ( Instituto Nacional Penitenciario i Carcelario) na Tuluá den un entrevista ku e kanal di notisia Caracol TV a konfirmá ku tabatin konfrontashon entre presunan.
Konsekuensia di e konfrontashon entre presunan rival na Tuluá tabatin komo konsekuensia ku nan a kima gran parti di un edifisio kaminda tin sèlnan ku e kriminalnan di mas peligroso nan ta enkarselá.
General Tito Castellanos a splika ku te ku ayera un total 51 presu a pèrdè nan bida karbonisá miéntras ku tin 30 presu ku a keda hospitalisá.
E presunan ku ta keda konsiderá komo sikarionan di Valle del Cauca a bringa ku otro pa motibu di poder den e prizon na Tuluá.
No tin duda ku lo bai tin represaya despues ku e prezunan aki a masakrá otro den e prizon di máksimo seguridat na Valle del Cauca.
General Tito Castellanos a bisa ku e prizon ta alberga 1.267 presu pero tin kapasidat pa solamente 800 presu.