Kampionato Nashonal Kòrsou JIU-JITSU 2022

WILLEMSTAD – Den fin di siman binidero, riba djasabra 3 di desèmber 2022, Curaçao Brazilian Jiu-Jitsu Federation (CBJJF) ta organisá un biaha mas e kampionato anual di e deporte Brazilian Jiu-Jitsu(BJJ).
E praktikantenan di e skolnan di deporte PRO-FIT, MEDINA GRAPPLING i IMMARTIAL lo batayá pa e título Nashonal den e diferente kategorianan di peso.
E aktual kampionnan di Jiu-Jitsu den nan respektivo kategoria di peso, lo mester defendé nan título e aña aki. Ta trata di e partisipantenan Larenz Mc Aully, Mohammed Mhimid, Russel Bouthisma i Jefferdson Jimenez.
Russel Bouthisma (IMMARTIAL) lo mester defendè su título kontra di Zarek Florez (MEDINA GRAPPLING).
Kevin Maria (PRO-FIT) ku aña pasá a gana e medaya di Plata lo batayá e aña aki atrobe fuertemente pa logra e medaya di Oro.
E partido prinsipal, ku tur hende den e deporte di pelea ta sinta warda riba dje, ta e pelea di Rob Gogulski (PRO-FIT) kontra di Jaime Francisco (MEDINA GRAPPLING). Rob Gogulski ta un personalidat konosí den e mundu di deporte di pelea i a logra ya kaba bon resultadonan den diferente estilo di pelea, entre otro MMA.

Jaime Francisco (MEDINA GRAPPLING), den pasado, ya a praktiká riba nivelnan haltu, riba tereno di deporte di pelea.
Tur dos e deportistanan aki tin 55 aña i ta demostrá ku Jiu-Jitsu ta ofresé posibilidat pa kompetensia na kualke edat.
E bataya aki di Gogulski vs Francisco lo ta un espektákulo riba su mes pa motibu ku tur dos deportista lo lucha pa e TÍTULO NASHONAL JIU-JITSU den e kategoria ‘MASTER 5’.
Karchinan pa e Kampionato Jiu-Jitsu ta na benta na e skolnan di deporte partisipante IMMARTIAL/ MEDINA GRAPPLING/ PRO-FIT i tambe na MENSING’S CAMINADA.
Entrada pa tribuna (GENERAL) ta 10 florin. Lo tin algun lugá limitá serka di e matnan (‘MATSIDE’) na rason di 25 florin.
E Kampionato di Jiu-Jitsu lo tuma lugá na Sentro Deportivo Kòrsou (SDK) di 19:00 – 22:00.
E sala di deporte lo ta habrí pa públiko for di 18:00.