Kambionan den lei pa transporte eskolar ya ta andando.

WILLEMSTAD. Pa hopi tempu e lei di transporte eskolar, na sierto manera, a ekskluí nos muchanan for di e posibilidat pa risibí transporte eskolar totalmente grátis.

Hopi bes nos ta mira kuantu ta e esfuersonan ku mayornan ta hasi pa por yega na algu finansiero pa por kubri gastunan di nos muchanan. Gastunan manera ünifòrm, higiena i algu pa kome, ta gastunan primordial na momentu ku nos ta papia di enseñansa.

I despues di esakinan, ta yega na turno pa kada mayor buska riba nan propio kuenta kon pa transportá nan yunan pa skol.

P’esei netamente, tin e lei di transporte eskolar aki, unda ta duna e posibilidat na kada siudadano ku tin yunan di edatnan entre 4 pa 18 aña pa disponé di transporte eskolar totalmente grátis. Pero kiko ta pasa na momentu ku e mucha kumpli e mayoria di edat?

Na momentu ku e mucha aki kumpli e mayoria di edat, e ta kai outomátikamente for di e lei di transporte eskolar grátis i tin ku kuminsá wak pa su mes kon pa yega skol, si dado kaso e kier sigui ku su estudio.

Según parlamentario, señor Gilbert Doran, esaki ta algu ku nos mester adaptá lo mas urgente posibel.

Si para duru riba e lei aki, nos lo ta limitando nos muchanan, i sigur esnan di ménos rekurso, pa studia te ku e edat di 18 aña. I/o tambe buska un trabou di ‘parttime’ ku kual nan lo por kubri nan gastunan di transporte. Konsekuentemente esaki por guia na desviashon for di nan estudio i mal prestashon na skol.

P’esei a kuminsá mes ora ku palabrashon i reunionnan ku e huristanan konserní pa adaptá e lei aki, stipilando awor e edat di entre 4 pa 24 aña.

Di e manera aki nos lo ta brindando e hóben i su mayornan un espasio di 6 aña, unda e hóben ta siña independisá i madurá pa despues por tuma e riendanan di su bida den su propio man.

Teniendo kuenta ku nos isla no ta pasando den su mihó momentunan, komo parlamentario, nos lo trata na duna un man, i suavisá dolor di nos pueblo tur kaminda ku por.

Ta nos deber di traha na bienestar di unu i tur, i tiki pero sigur, nos lo sa di hasi esaki na e mihó manera posibel.

Gilbert Doran

Miembro di Parlamento

Pa Frakshon di MFK