Juniel Carolina, Parlamentario di Pueblo: “Ora gasolin baha ku 17 sèn… Kita 5 pa deporte”…

Deporte 5 Star a kombersá awe mainta ku Parlamentario Sr. Juniel Carolina, konsiderá “E Parlamentario Di Pueblo” siendo un hòmber ku semper a yuda e Pueblo i ku siendo Parlamentario ketu bai ta dobla manga di kamisa i hasi kos pa yuda den komunidat prinsipalmente deporte i esnan den nesesidat. Juniel Carolina a bisa 5 Star ku e ta proponé pa na momento ku gasolin baha ku 17 sèn, pa destiná 5 sèn pa deporte.

Juniel ta bisa ku si hasi esei den 6 luna bo ta generá 2.000.000 florin.

E sèn e ta kuminsá pa yuda ku e nesesidatnan di nos deporte.

“Nos lo por yuda pone terenonan/kanchanan den mihó kondishon pa por práktika i kompetí.

Deporte tin masha hopi nesesidat. Mira kon nos muchanan ta saka kara.

Nos tin masha boluntario ku no ta haña nada den un tempu difísil.

Muchanan tin di bai afó i mester kasi pidi limosna pa por representá nos Pais”, Juniel Carolina ta splika.

Juniel ta bin di un famia di deporte i ta hopi serka.
Esei mes ta pone ku e ta roga pa na momento ku gasolin baha ku 17 sèn, destiná 5 sèn pa deporte, pa kubri tur e nesesidatnan básiko di nos deporte.