Juniel Adelina i Alvaro de Avila Yepez: Tabata na Antigua & Barbuda pa partisipá na e Concacaf Instructors Course!

WILLESMSTAD – Despues di e grato notisia di un arbitro di Kòrsou ku a subi lista di FIFA, tin mas notisia alentador den kuerpo di abritrahe pa kompartí. Di 6 pa 9 di yanüari último, instruktornan di físiko Juniel Adelina i Alvaro De Avila Yepez a biaha pa Antigua & Barbuda pa partisipá na un kurso pa rèfri i instruktornan organisá pa CONCACAF.
Un total di 10 instruktor, 15 rèfri i 7 asistente di diferente pais a partisipá na e kurso aki kaminda Juniel i Alvaro a representá Kòrsou komo instruktor di físiko. Un kargo ku resientemente nan a asumí den departamentu di rèfri despues ku e puesto aki a bira liber.
E kurso aki a keda duná pa Dave Meikle, Victor Stuart i Kelesha Antoine kendenan ta instruktor di FIFA. Meta di e kurso aki tabata pa elevá e nivel di nos rèfrinan pa nos por tin mas rèfri riba lista di FIFA i mas ku klaro tin un prestashon optimal durante nos kampionatonan lokal. Debí ku e aña aki nos tin un rèfri riba lista di FIFA, Kòrsou ta haña mas oportunidat pa partisipá na e kursonan aki ku lo tuma lugá durante aña.
Segun nos representantenan ku a partisipá na e kurso aki, e kurso a bai bon i nan ta tin e oportunidat pa interkambiá di pensamentu riba diferente tópiko ku ta regardá e desaroyo i progreso di nos rèfri i tambe instruktornan. E kurso ta tin un parti práktiko i tambe teorétiko kaminda e diferente partisipantenan a optené hopi informashon pa por kompartí ku nan rèfri i instruktornan na nan respektivo paisnan.