Josiane Janzen a kumpli 40 aña den servisio di Gobièrnu

WILLEMSTAD- Dia 1 di sèptèmber 2022, sra. Josiane Janzen a kumpli 40 aña den servisio di Gobièrnu. Djabièrnè 11 di novèmber trahadónan di Opleidingsinstituut Rechtshandhaving & Veiligheidszorg a bini huntu pa selebrá e echo aki huntu ku Josiane Janzen i su famia. Durante un seremonia direktor di ORV sra Alpha Falbru a dirigí palabra i gradisí sra Josiane Janzen pa su añanan den servisio Gobièrnu. Tambe a dirigí palabra hefe di Initiële Opleidingen sr. Djener Jansen i èks hefe di Initiële Opleidingen penshonado sr. Edward Margarita. Direktor di ORV sra Alpha Falbru na nòmber di Gobièrnu di Kòrsou a entregá dekretonan Gubernamental i plakaat di rekonosimentu na e hubilario den presensia di su yu- i rumannan. Josiane Janzen a gradisí Dios na promé lugá, su yunan i demas famia, koleganan pa e sosten pa e por a logra e 40 añanan den servisio di Gobièrnu. Yunan di Josiane Janzen tambe a dirigí palabra i gradisí tur ku a kontribuí pa nan mama yega na e 40 añanan di servisio. Den luna di novèmber 2022 Josiane Janzen a baha ku VVU. Despues di e seremonia koleganan di ORV a felisitá e hubilario Josiane Janzen i pasa un ratu ameno huntu na ORV. Sra. Janzen a saka un pòtrèt ku tur kolega na entrada di ORV na Winston Churchillweg 8.
KARERA
Josiane Janzen a drenta den servisio di Gobièrnu dia 1 di sèptèmber 1982 i a traha na Domeinbeheer pa 5 aña, pa despues drenta Kuerpo Polisial di Antias Hulandes na aña 1987. Na ougùstùs 2007 Josiane Janzen a kuminsá komo dosente na LPO ku despues a bira ORV.