Joe Biden a komprometé pa repatriá merikanonan ku a keda detené na Rusia

WASHINGTON – Joe Biden presidente di Merka durante su rueda di prensa ayera a konfirmá ku elo bai hasi tur lokual ta na su alkanse pa repatriá dos merikano ku ta enkarselá inhustamente na Rusia.
E mandatario a bisa ku ya kaba via kanalnan diplomátiko a kuminsá ku kontaktonan pa atendé ku e proseso di e dos merikanonan ku ta enkarselá na Rusia.
Tin indikashon ku Joe Biden a kombersá kaba ku Elizabeth Whelan ruman di Paul Whelan ku a keda arestá na Rusia na 2018.
Paul Whelan a keda akusá di spionahe ku segun outoridatnan merikano su detenshon ta keda konsiderá komo eróneo.
E otro merikano ku ta detené na Rusia ta e basketbolista profeshonal Brittney Griner.
Parse ku Brittney Griner a deklará su mes kulpabel di poseshon i kontrabanda di droga den un korte na Mosku.
Brittney Griner ta enkarselá na den un prizon na Mosku for di luna di febrüari i ku ta sklamando pa presidente Biden negoshá ku outoridatnan Ruso pa lage den libertat i asina bai Merka bek.
Lo ta interesante pa wak kon presidente Joe Biden lo bai logra negoshá pa e dos merikanonan aki haña na libertat konsiderando ku relashon diplomátiko entre e dos paisnan aki no ta bon.