JJIC (antes GOG) tabata tema sentral den reunion di parlamento djabierne

WILLEMSTAD. Djabierne ultimo Parlamento di Kòrsou alo menos un parti dje parlamentarionan a diskuti e situashon di e instituto penitensiario GOG ku awendia yama JJIC pero loke a bin dilanti ta un panorama tristu.
Mandatarionan di turno tur a hasi manera e instituto no ta eksisti i e problemanan a kai riba lomba dje trahadónan. E dirigentenan dje instituto pa bèrgwensa hustifiká no a laga saka foro dje degenerashon fisiko dje instituto ounke nos tin sigur ku si a hasi un apelashon riba periodista i fotografonan pa denigra e klientenan ku foto den korant, nan lo a kumpli.
Un parlamentario ku a papia ku pashon pe kousa dje adolesentenan ku ta den e instituto tabata Juniel Carolina i si tabatin un ke otro parlamentario ku a papia mes, tabata pa laba man manera Ponsio i Pilato pa hende no kere ku nan partido tabatin arte ni parte den degenerashon dje instituto.
E liña korá den e petishon pa tene e reunion aki tabata Maneho, Fuga, Alimento i (falta) di siguridat. Tradishonalmente e instituto tabata meresé un kalifikashon di “Wie bewaakt de bewaker?” pasobra tradishonalmente kuaternan tabata abusá seksualmente di loke popularmente nan ta yama ‘karni fresku’ den e instituto.
Pa meritorio ku e señalamentu di parlamentario Carolina tabata, e tabata super kouteloso den su palabranan pa publiko no kere ku su partido tin parte ni parte den e situashon aki.
E no kier a mustra dede riba niun gobiernu ni èks minister ni mustra dede riba niun gobièrnu i menos e èks minister di Hustisia sino ku e gabinete aki a bin heredá e situashon.
Ela puntra konta ku e oportunidat pa trabounan riba tereno di limpiesa i mantenshon pasobra ora ku un mucha delinkuente ta den JJIC pa ladronisia, ta pasobra e tin mester di sèn o gusta sèn.