Jill Biden a yega Ecuador pa inisiá su gira pa Amérika Latina

QUITO – Jill Biden primera dama di Merka a yega Ecuador ayera nochi pa asina inisiá su gira pa Amérika Latina.
Na yegada di Jill Biden na Ecuador ela keda risibí pa María de Lourdes Alcívar primera dama i kasa di presidente Guillermo Lasso.
Tambe tabata presente Juan Carlos Holguín minister enkargá ku relashonnan eksterior.
Mester bisa ku tabatin bastante áwaseru ta kai ayera tardi na momentu ku Jill Biden a yega Ecuador pero asina mes ela risibí un trato presidensial ku tur su onornan.
Komo ku tin bastante inseguridat na Ecuador gobiernu a sòru pa tin militarnan pa atendé ku kontrol delaster kaminda ku Jill Biden i María de Lourdes Alcívar mester a pasa riba karetera.
Despues di e bishita ofisial di Jill Biden na Ecuador elo sigi ku su gira pa Panama i finalmente Costa Rica.
Jill Biden lo biaha djabièrnè pa Panamá kaminda elo reuní ku primera dama Yazmi Colón de Cortizo na e Palasio presidensial.
Na Panama lo bai tin vários aktividatnan organisá pa Jill Biden i Yazmin Colón.
Finalmente djadumingu Jill Biden lo yega Costa Rica kaminda elo reuní ku Rodrigo Chaves i su kasa Lady Signe Zeikate.