Jedrek ta konfirmá: A drenta petishon “Show” di vehíkulo pisa… A pone kondishon !!

• Deporte 5 Star ayera a kombersá ampliamente ku Sr. Jedrek Magdalena ku ta e presidente di nos Federashon di Baseball di Kòrsou. 5 Star a komprondé ku dia 26 di yüni próksimo ta bai tin un aktividat grandi den Stadion Johnny Vrutaal. Ta trata aki di un “Show” di Vehíkulo Pisá manera: Katapila, Trùk Grandi. Un espektákulo kompleto ku nan ta yama:”Real To Real”. Naturalmente e informashon a trese pániko serka esnan ku ta stima baseball paso esei lo nifiká ku ta kaba di hinka e superfisie di stadion Johnny Vrutaal den ainda mas mal estado. E máksimo dirigente di baseball a konfirmá e petishon pa e aktividat. E la bisa ku nan a pidi e stadion di 24 di yüni pa 1 di yüli.”Pa por haña e stadion e organisadónan di e evento tin di kumpli ku un kontrakt ku lo traha pa nan. E stadion riba Rif ta kai bou di FEBEKO. Nan lo tin di paga hür pa e stadion, i pone e tereno bek den bon kondishon despues dje aktividat. Nan tin di kumpli ku e kontrakt ku nos a manda pa nan. Ainda no tin nada firmá”, e presidente a deklará.