Jedrek Magdalena hopi emoshoná…

Sin duda pa nos ta komprendibel e emoshon di presidente di FEBEKO ayera despues dje triunfo di Kòrsou riba e representashon di Estádos Unídos.

Triunfo ku a pone ku Kòrsou ta den e gran final di e torneo di baseball di Haarlem. Jedrek no por a kontené su lágrima loke pa nos ta humano i kompletamente komprendibel.

Ta un echo ku Jedrek siendo presidente di FEBEKO ta haña su krítika (nan) loke tambe mester ta komprendibel pa Jedrek. Tin biaha krítika hustu, otro biaha inhustu. Jedrek tin di komprondé, ounke hóben ku e krítika ta parti dje “trabou”.

I si krítika no ta personal tin di atendé kuné i kontinuá.

Nos tin mas ku 50 aña hopi serka di baseball, i Jedrek mag sa ku tur presente di FEBEKO mester a soportá krítika sin eksepshon.

Dirigentenan di aktualidat por ta kontentu mes, pasó ántes esnan ku tabata bai reunion general tabata bini muchu mas mihó prepará i fuerte.

Ta asina ta deporte na Kòrsou, ora bo ta den direktiva, sea presidente o na kualke posishon, bo ta un SIRBIDÓ, den nos deporte no tin “propietario”, bo tin di soportá krítika.

Ta asina e “bida” den deporte ta, pa NOS TUR !!

Bo tin di atendé ku krítika sigur ora bo ta na kabes, i sigui, sino lubidá..