J’Dah Girigorie a tira 16 ponche pa nos gana 2-0: Liga Soraida Juliana SL den Semi-Final di mundial…

E representashon di nos softball femenino fastpitch Little League Liga Soraida Juliana kategoria Senior League a hasi historia ayera ora ku pa di promé biaha un representashon di nos softball Little League Liga Soraida Juliana pasa pa un semi-final.
Den e wega di ayera nos muchanan enkabesá pa Sra. Yuretti Poulo a gana 2-0 ku 16 ponche di J’Dah Girigorie.
E orguyo di Patrick tabata sensashonal den e wega di ayera retirando e promé 9 batidónan ku e la enfrentá i finalisá e wega ku no ménos ku 16 ponche loke a pone ku a sobra masha poko out pa su tim yud’é saka.

Ku e triunfo aki nos ta hunga semi-final awe vs Delaware 5.30 pm di atardi.
Ganadó nos ta pasa pa final dje mundial kategoria Senior.

Deporte Star a kombersá ku presidente di Liga Soraida Juliana Sra. “Nitika” Manuela kende bisa nos ku e selekshon a pèrdè su tres promé weganan, pero ku nan a laga asina bon impreshon atras ku tur hende tabata papia di nan. Ayera ku e triunfo 2-0 nos muchanan ta pasa pa semi-final.
“Nos a Sali di kuater den nos pul i nos a eliminá number-1 di pul-B.

Nos tim ta hungando bon.
Nos tin di keda lucha.
Tur hende na Delaware ta papia di nos muchanan.
Fuera di hunga sòftbòl, nan ta alegre i ta kanta bai hotèl despues di kada wega. Nos ta bai pé”, asina Sra. “Nitika” a deklará na 5 Star.
E wega ta vs Delaware i awe tardi 5.30 pm. Nos lo tin di eliminá e tim di kas naturalmente.