Intento di atrako riba tank trùk di Curoil kargá ku kombustibel

WILLEMSTAD – Atrakadónan a blòkia un tank trùk di Curoil ayera nochi na altura di Pizza Hut na Santa Maria. Direktor di Curoil, Jamil Lasten a splika ku ayera nochi den kareda di mitar di 8 ela risibí un yamada ku tabatin intento pa atraká ùn di e tank trùknan di Curoil. Ta trata dje tank trùk di más grandi di Curoil ku ta karga 30 míl liter di kombustibel. Den e kaso di ayera, e truk tabata kargá ku gasolin.
E driver atento ku a tuma nota ku un deskonosí a logra subi riba trapi di e trùk, a kue mesora direkshon pa warda di polis Rio Canario i di e forma aki a logra evitá un suseso ku por tabata tin un desenlase lamentabel. E intento di atrako riba un trùk kargá ku kombustibel ta un akto totalmente deskabeyá ku por a trese bida di hopi hende den peliger. Produktonan petrolero ta sumamente flamabel i ta rekerí pa atendé ku esakinan ku suma koutela i segun protokòlnan estrikto di seguridat. Jamil Lasten a bisa ku resientemente na Mexico tabatin un kaso similar na di esun di ayera nochi na Kòrsou, kaminda ku hopi hende a muri debi na un eksploshon ku a surgi.
Mester tene kuenta ku e hendenan ku por maneha e tank trùknan, ta personal ku a risibi hopi training i ku ta kapasitá pa hasi e tipo di transporte aki. Nan ta prepara kon mester aktua den situashonnan ku presentá. Esaki ta nesesario pasobra ta trata di un produkto inflamabel i mester tene kuenta ku ún chispa òf un tiki kayente por kousa un desgrasia grandi, e direktor di Curiiol ta splika.
Entretantu Curoil a tuma medidanan di seguridat adishonal pa garantisá seguridat di su empleadonan i seguridat riba kareteranan. Curoil ta lamentá e suseso aki i e kaso ta bou di investigashon di Kuerpo Polisial. Mas aleu Curoil ta enfatisá ku no tin sèn kèsh riba e trùknan di distribushon di Curoil i Curgas.