Inflashon ta persistentemente haltu i a frena forsa di kompra di pueblo

WILLEMSTAD/PHILIPSBURG – Centrale Bank van Curaçao en Sint Maarten (CBCS) lo adoptá un maneho monetario mas stringente, oumentando su tasa di interes ofisial (‘beleningsrente’) ku 1,25 punto porsentual, te na 4,75%.
‘Tasa di interes ofisial’ ta e tasa ku CBCS ta ofresé e bankonan komersial pa fiansa den kaso ku nan tin falta di likides. E oumento aktual di e tasa di interes ofisial ta reflehá un oumento adishonal proyektá di e tasanan di interes riba merkado finansiero internashonal, partikularmente e tasa di reserva federal estadounidense.
Maske e reserva (di valuta ofisial bruto) i e kapital pa paga pa loke Kòrsou ta importá ta sigui na un nivel sólido, e reserva a mustra un tendensia di bahada den transkurso di 2022 i merkado ta premirá ku esaki lo baha mas otro aña. Pa e motibu akí, CBCS su Komité di Maneho Monetario (MPC) 1 lo sigui vigilá e desaroyonan ekonómiko i monetario den e union monetario djaserka i lo adaptá su maneho monetario si ta nesesario.
Komo konsekuensia, entre otro di e inflashon persistentemente haltu ku ta frena forsa di kompra di e konsumidó, e kondishonnan di finansiamentu mas stringente, i e efektonan indirekto di e gera na Ukrania, kresementu ekonómiko mundial a stanka supstansialmente na 2022 i e tendensia ei lo kontinuá na 2023.
Apesar di e nivel haltu di inflashon, Produkto Interno Bruto (PIB) real a sigui krese na tur dos pais di e union monetario e aña’ki 2022.
‘Segun e sifranan preliminar, Kòrsou lo registrá un kresementu di 5,9% den su PIB real, miéntras ku Sint Maarten lo registrá un kresementu di 5,1%. Na ámbos pais (Kòrsou i Sint Maarten), loke a sostené e kresementu akí tabata prinsipalmente un rekuperashon den turismo di estadia’, segun dr. José Jardim. A baha e proyekshon ekonómiko pa 2023 prinsipalmente pa motibu ku ta premirá un bahada den kresementu ekonómiko di e partnernan komersial prinsipal di e union monetario (CUR/SXM), ku ta Estádos Unidos i Hulanda.
‘Na 2023, e kresementu ekonómiko real lo baha den tur e dos paisnan di e union monetario, te na 2,7% pa Kòrsou i 3,3% pa Sint Maarten’, dr. Jardim a sigui splika. E preisnan haltu tantu di krudo komo di otro materia prima riba merkado internashonal a pone e union monetario su relashon di interkambio a daña rápidamente.