In memoriam Pastor Luigi Verdecchia Culla

25 di yanüari 1943  (Italia) – 16 di aprel 2021+ (Venezuela)

Pastor Luigi Verdecchia Culla a nase  25 di yanüari 1943 den e siudat Padua, ku ta keda den nort di Italia.

E aña akí, pa ta eksakto riba 31 di yanüari, Pastor Luigi a selebrá 60 aña di bida religioso. 31 Di yanüari ta e fecha ku famia Salesiano rònt mundu ta selebrá fiesta di nos patrono San Huan Bosco, Tata, Maestro i Amigu di mucha- i hóbennan. Komo Pader Salesiano, Pastor Luigi tambe tabata forma parti di e gran famia akí.

For di aña 1980 Kòrsou, pero en partikular Buena Vista, ta bendishoná ku presensia di padernan di e kongregashon Salesiano, di kual nos Mgr. Luis Antonio Secco ta un di e promé padernan Salesiano ku a bin Kòrsou pa yuda i guia e pueblo di Dios.

Pastor Luigi ta yega Kòrsou na sèptèmber di aña 2000 i ta bira pastor di Parokia La Bírgen Milagrosa, Buena Vista. Tur ku a konosé Pastor Luigi a eksperensiá su manera kariñoso, dediká, alegre, tin ora chistoso i semper buskando di saka lo mehor di kada persona. Manera e tabata bisa, buska di ta ekselente den tur loke bo ta hasi pa Dios.

Ademas di su yamada komo saserdote, Pastor Luigi tabata sikólogo i eskritor. E donnan akí tabata reflehá den su trabou di tur dia. Pastor Luigi, Salesiano di kurason, tabatin hopi atenshon i kariño pa mucha- i hóbennan,  speshalmente esnan den nesesidat. E tabata praktiká e pedagogia preventivo di San Huan Bosco atraves di entre otro lès di katisashi i konfirmashon.

Pastor Luigi a keda Kòrsou entre 2000-2008 i a inisiá diferente obra. El a lanta konseho parokial di Buena Vista, tabata bishitá skolnan den bario, yuda esnan mas nesesitá pa haña un yudansa pa sigui studia. Tambe e tabata organisá kursonan pa gruponan di parokia. E boletin Kontakto di Parokia Buena Vista ta otro inisiativa di Pastor Luigi. E tabata responsabel pa renobashon  di  misa La Bírgen Milagrosa tantu paden komo pafó.

Pader Luigi, chikitu na estatura, firme den su pasonan, ku bos fuerte tabata prediká alkaso, tin ora poko fuerte ku un sabor humorístiko pa suavisá… asina  yuda e fiel komprondé e mensahe di e Evangelio…

Pader Luigi komo Pastor i eskritor ta laga siñansa atras. Mi ta terminá e memorial akí ku un pasashi for di un di su bukinan esta:

Si me amas no me quieras

“Soy signo visible del Dios invisible… Si me amas, sé reflejo del amor de Dios. Tú me hablas de El con tu existencia… eres signo visible del Dios invisible…”

Awe Pastor Luigi no ta visibel mas pa nos, pero su trabou, kariño i legria lo keda visibel den nos mente i kurason. Pa via di nos fe den Dios Tata nos ta kombensí ku el a topa kara kara ku Dios Tata.

Ku su alma sosegá na pas.

Parokia La Bírgen Milagrosa

Buena Vista

16 di aprel 2021