Impreshonante inougurashon di proyekto Literatura Ekspresivo

Djasabra dia 9 di òktober a tuma lugá inougurashon di e proyekto di literatura ekspresivo titulá “Añanan 50. Tempestat den kas di famia” den oula di UoC.
Esaki a keda presentá pa artistanan di e organisashon literario”Grupo Ekspresá”, dirigí pa sra. Viola Ravenstein-Lourens, ken tambe ta outor di e obranan i di poemanan ku kantikanan ku a keda presentá.
Tabata un atardi sumamente dushi. E obranan tabata na nivel i a pone públiko gosa di e intriganan ku nan ta kontené. E elenko ku a presentá a duna un tremendo aktuashon ku instrukshon balioso di Laura Quast.

 E aktividat tabata hopi bon organisá i a kore manera un trein den man di e MC, Caresse Balentien-Hooi. E presentashon riba skrin di portrètnan di sierto esena for di e obranan, deklamashon di poema di e hóbennan talentoso Tahnee Jamanika ku Denzjelo Nassi, banda di kanto di “Kuarteto Ekspresá, spesialmente lantá pa e proyekto i ta konsistí di Margi Craaneveldt, Edsel Josephina, Lianelly Rosalina ku Bryan Elisa, bou di direkshon di dirigènt i areglista, Lindo Casper, a duna e aktividat un dimenshon spesial ku a konta ku entusiasmo di esnan presente.

Durante pousa e públiko a keda gratamente entretené pa grupo musikal “Kabayeronan Musikal Potente”. Públiko a konsiderá e atardi ku tur su aspektonan komo sumamente eksitoso. Bo por a mira ku e tipo di aktividatnan aki tabata hasi hopi falta ya ku e públiko presente tabata disfrutá no solamente di e obra pero tambe di e muzik ku e grupo musikal a trese durante di pousa. Lokual tabata hopi importante tabata e orario tempran ku e aktividat a tuma lugá ku a pone ku hopi hende, spesial nos hendenan un tiki grandi por a partisipá sin problema ya ku ora kos a kaba tur hende por a regresá nan kas na un ora kristian.
E ekspektativa i interes pa e próksimo funshon di dia 13 di novèmber awor, ya ta grandi bou di e presentenan di djasabra último.

Un pabien di kurason na tur ku a duna nan aporte pa e promé atardi di e seri di 6, resultá un éksito rotundo. Si tin hende ta interesá den mas informashon por tuma kontakto ku Viola Ravenstein na telefòn 5182497 /7373991