IMF ta rekomendá pa: Tin ku Reserva fondo riba presupuesto pa SVB i CMC

WILLEMSTAD. E siman aki tres tema a dominá titularnan den prensa na Kòrsou i kualnan tabata e leinan ku Sekretario di Estado ulandes Raymond Knops ta eksigi pa parlamento pasa pa retené salario for di Minister i parlamentarionan, e kuadro ku presidente di CFT prof. dr. Raymond Gradus (ki koinsidensia ku tur dos yama ‘Raymond’ i e raport di IMF riba pasonan ku gobiernu tin ku tuma pa hiba nos pais den direkshon di rekuperashon ekonomiko.
Introdukshon dje evaluashon di IMF no ta zona bon i no ta priminti masha kos bon pa e konklushon final.
E pronóstiko ta 000 kresementu ekonomiko pa motibu di kolapso total di turismo i Lockdown.
Pero un rekomendashon pisá ku IMF a hasi ta pa gobiernu reserva plaka riba presupuesto pa paga su debenan na SVB i finansia debenan di CMC.
Kuminsando ku e ultimo aki, e opinion di tantu Ulanda komo IMF riba maneho finansiero di Kòrsou tabata devastador.
No asina tantu pa e maneho riba mes sino pa konsekuensianan di e situashon finansiero ku a kuminsa muchu mas promé ku nos a drenta den e fase konstitushonal di 101010.
Un periodo di 10 aña kaminda Ulanda a kuminsa pa perdoná Kòrsou 2000 mion florin dje debe ku Kòrsou tabatin a rason di 3500 mion florin.
Un bista real dje debe pa loke sea e ta, tin ku tene na kuenta ku nunka gobernantenan a logra likida e debe ku a keda sino a keda fia riba dje.
E konklushon i rekomendashon ku Fondo Monetario Internashonal a laga atras ta bisa lo siguiente:
· e pandemia kousa pa COVID-19 tabata un gòlpi mayor pa ekonomia di Kòrsou
· apesar dje montantenan voluminoso di plaka ku Ulanda a pòmp den ekonomia di Kòrsou, ekonomia di Kòrsou a kai duru riba su ‘derrière’
· e perspektiva pa mehoramentu ta keda pálido.

DESAROYONAN RESIEN
Pero promé ku e pandemia ya kaba e volkano di eksploshonnan tabata manifestá su mes den forma di konsekuensia dje krisis na Venezuela i ku a paga e kandela di refineria kompletamente. Un pilá kompleto di nos ekonomia a basha bin abou asina i loke ta pió, ta ku no tin perspektiva ku maske kuantu plaka hinka den e kolekshon di heru bieu, ta “goed geld achter slecht geld gooien” manera makamba ta bisa.