“Imagine Rotary” ta e tema pa direktiva nobo di Rotary Club Willemstad

Djabièrnè anochi último riba promé di yüli a presentá e direktiva nobo di Rotary Club Willemstad na miembronan di e klup i nan pareha i tambe na otro invitadonan. (Change of the Board). Anfitrion Lisanne Halleriet a yena e anochi di un manera prèt. Presidentenan den duo saliente Benno van Leeuwen i Rob Kouijzer ta traha lugá pa Bony de Kloet-Binkhuijsen i Martin Venlo. E duo akí lo no sinta manera ta kustumber pa 1 aña komo presidente, sino pa 2 aña.
6 Komishon ta sostené e direktiva den ehekushon di e aktividatnan i proyektonan den kuadro di desaroyo sosial i ekonómiko, Salu pa Mama, Yu i Medio ambiente. Banda di esaki Rotary ta enbolbí Interact (hóbennan di skol sekundario) i Rotaract (adultonan hóben entre 18 i30 aña) den nan proyektonan, di manera ku nan ta siña guia, planifiká, koperá, delegá i koordiná. Un parti di e miembronan di Rotaract ta bira parti di Rotary despues ku nan kumpli 30 aña, i sobrá miembronan ta bini for di mundu di komersio di Kòrsou.
Durante e aña ku a pasa Rotary a organisá RYLA (Rotary Youth Leadership Award), Rotarrally, Walking Dinner, pero tambe CuraDoet i Clean-Up ta proyektonan “hands-on” kaminda tur fellow ta saka man yuda. Durante e lùnchnan semanal a invitá diferente kompania pa duna un presentashon, òf a organisá bishita na diferente kompania. Bou di guia di Benno i Rob a instalá 5 miembro mas, di manera ku e kantidat di miembro a bira 40. E porsentahe di hende hòmber i muhé ta pareu, loke pa Rotary International ta eksepshonal.
Bonny i Martin ta entusiasmá pa e presidensia den duo. Nan tur dos ta para pa integridat, transparensha i akshon. Nan ta hopi aña kaba miembro di Rotary, pues nan konosé otro bon. E direkshon di e aña ku a pasa basá riba koperashon, “Service above Self”, hubentut di Kòrsou i durabilidat lo no kambia mashá. Mas bien e lo bira mas intenso. Esaki nan ta hasi huntu ku e presidentenan saliente, komishonnan i sobrá miembro.