Hustisia a tarda pero porfin a yega…. Fiskal a pidi 18 aña pa duo ku a asesiná chines doño di tienda na Janwe.

WILLEMSTAD. Un krimen ku no tabata mag di para bira un ‘cold case’ ayera tabatin su semi-kulminashon den korte ora ku fiskal di Ministerio Publiko a pidi un kastigu di 18 pa e duo di kriminalnan ku a asesiná un chines doño di un tienda na Oude Caracasbaaiweg dia 9 di mei 2013 – seis aña pasá – dia ku e duo Quincley Poppen i Shaheen File a asesiná e doño di Hua Jiant Minimarket no muchu leu for di e rotònde di misa di Janwe.
E suseso aki a pasa ampliamente riba medionan sosial, kaminda por a mira un komersiante chines ku a lucha tenasmente ku un krùk den su man pa hasi e atrako imposibel, pero finalmente tòg un di e atrakadónan a tira e hòmber chines mata ku un arma di kandela.