HUMILDAT

Promé parti

Humildat: E virtut moral pa kua e hende ta rekonosé ku di su mes e tin únikamente nada i piká. Tur kos ta un don di Dios di kua nos tur ta dependé i na ken nos debe tur gloria. E hende humilde no ta aspirá grandesa personal ku mundu ta atmirá pasobra el a deskubrí ku ser yu di Dios ta un balor hopi superior. E ta bai tras di otro tesoronan. E no ta den kompetensia. E ta mira su mes i e próhimo dilanti Dios. E ta asina liber pa stima i dediká su mes na amor i na servisio sin desviá den huisio ku no ta pertenesé na dje.
Humildat no únikamente ta oponé su mes na orguyo sino tambe na outo humiliashon den kua e ta stòp di rekonosé e donnan di Dios i e responsabilidat di ehersé nan segun su boluntat.
“Humildat ta e bèrdat” -Santa Teresa de Avila.
E persona humilde ta mira kosnan manera nan tan, lo bon komo bon, lo malu komo malu. Segun ku e hende ta mas humilde un vishon mas korekto di e realidat ta krese.

”E grado mas perfekto di humildat ta komplasé bo mes den menospresio i humiashon. Un menospresio sufrí ku pasenshi pa su amor ta bal dilanti di Dios mas ku mil ayuno i mil disiplina.” -San Francisco de Sales, 1567

Humildat
Tumá di numeroso fuente

E humildat perfekto ta Hesus.
Hesus ta e humildat enkarná. Perfekto den tur virtut, E ta siña nos den kada momento den kada palabra. Siendo Dios, El a biba 30 di su 33 aña den bida skondí, ordinario, manera un di hopi. Lo ekstraordinario tabata e perfekshon den kua El a biba lo ordinario. Tambe su 3 añanan di bida públiko ta humildat perfekto. Den tur loke E tabata hasi, manera semper boluntat di su Tata. Nunka El a buska yama atenshon riba su mes ma duna gloria na Tata. Na final El a muri riba Krus. El bisa nos: “Siña di Mi pasobra mi ta mansu i humilde di kurason”.

Hesus ta drecha e daño di Adam ku ta rebeldia dilanti Dios i tur orguyo ku ta sigui. Otro modanan di yama e venenu akí: amor propio, egoismo i soberbia.
Ningun hende hamas tabatin dignidat komparabel na esun di djE, ningun hende a sirbi hendenan ku tantu kuido: Ami ta mei mei di boso komo Esun ku ta sirbi. Te ainda esaki ta su aktitut pa ku kada un di nos. Dispuesto na sirbi nos, na yuda nos, na lanta nos di nos kaidanan. Nos ta sirbi otronan, den famia, na trabou, den e fabornan anónimo ei ku kisas hamas ta bai na ser agradesido?

Mi a duna boso un ehèmpel – Señor ta bisa despues di a laba e pianan di su disipelnan – pa boso tambe hasi pa otro loke Ami a hasi pa boso -Cf. Hn 13, 15. E ta laga pa nos un lès supremo p’asina nos komprondé si nos no ta humilde, si nos no ta dispuesto na sirbi, nos no por sigui e Maestro.

Señor ta invitá nos pa siguié i imit’é i ta laga pa nos regla simpel, pero eksakto, pa biba karidat ku humildat i spiritu di servisio: Wèl, trata otro hende den tur kos meskos ku bo ke pa nan trata bo -Cf Mt 7, 12. E eksperensia di loke ta agradá mi òf ta molestiá mi, di loke ta yuda mi òf ta hasi mi daño, ta un bon norma di loke mi mester hasi òf evitá den trato ku otronan.

Loke nos tur ta deseá:
Nos tur ta deseá un palabra di aliento ora kosnan no a bai bon,
i komprenshon di otronan ora, apesar di e bon boluntat, nos a bolbe kiboká;
i ku nan ta fiha den lo positivo mas ku den defektonan;
i ku tin un tono di kordialidat den e lugá kaminda nos ta traha òf na ora di yega kas;
i ku ta eksigí di nos den nos trabou, pero di bon manera;
i ku ningun hende ta papia malu tras di nos lomba; i ku tin un persona ku ta defendé nos ora nan ta kritiká nos i nos no ta presente; i ku ta preokupá di bèrdat pa nos ora os ta malu;
i ku ta koregí nos di forma fraterno di e kosnan ku nos ta hasi malu na lugá di komentá nan ku otronan;
i ku ta resa pa nos i….

Esaki ta e kosnan, ku, ku humildat i spiritu di servisio, nos mester hasi pa otronan. Discite benefacere (Siña hasié bon). Si nos komportá nos asina, e ora ei: Boso pikánan ta kòrá manera sanger, pero nan por bira blanku manera lechi; nan ta kòrá manera kandela, pero nan por bira blanku manera lana puru.. Is 1,18.

Loke nos tur mester kambia: soberbia
Dor di orguyo nos ta buska superioridat riba otronan.
Soberbia ta konsistí den amor desordená pa e propio ekselensia. -Santo Tomás.

Soberbia ta e afirmashon apnormal di bo mes.
E hende humilde, ora ku e lokalisá algu malu den su bida por korigié, aunke e ta hasié doló. E persona soberbio na ora di no aseptá, òf no mira, e defekto aki no por korigié i ta keda sintá kuné. E persona soberbio no konosé su mes òf konosé su mes malu.
Soberbia ta kontaminá tur kos. Kaminda tin un persona soberbio, tur ta kaba maltratá: famia, amigunan, e lugá kaminda e ta traha… E lo eksigí un trato spesial pasobra e ta kere ku e ta distinto, nos mester tene masha kuidou pa no herida su suseptibilidat… Su aktitut dògmátiko den kòmbersashonnan, su intervenshonnan iróniko -no ta import’é laga otronan keda mslu p’asina e keda bon-, e tendensia na pone punto final na kòmbersashonnan ku a surgi ku naturalidat, etcetera, ta manifestashonnan di algu mas profundo: un gran egoismo ku ta poderá di e persona ora el a pone horizonte di bida riba su mes.

”Esun di mas importante mei mei di boso, lo ta boso sirbidó” -Mt 23, 11. Ta pesei nos mester laga nos egoismo un banda i deskubrí e manifestashonnan aki di karidat ku ta hasi otronan felis. Si nos no lucha pa lubidá kada be riba nos mes, nos lo sigui pasa banda di esnan ku ta rondoná nos i nos lo no realisá ku nan mester di un palabra di aliento, balorá loke nan ta hasi, animá nan na ser mihó i sirbi nan.
Egoismo ta siega i ta sera nos horizonte pa otronan; humildat konstantemente ta habri kaminda pa karidat den detayenan práktiko i konkreto di servisio. E spiritu alegre akí, di apertura na otronan i di disponibilidat ta kapas pa transformá kualkier ambiente. Karidat ta penetrá manera awa den e grieta di e piedra, i ta kaba dor di kibra e resistensia mas duru. “Amor ta produsí amor” -SANTA TERESA, Vida, 22, 14. San Juan de la Cruz a konsehá: “Kaminda no tin amor, pone amor i lo bo produsí amor” -SAN JUAN DE LA CRUZ, Carta a la M. M.0 de la Encarnación, en Vida, BAC, Madrid 1950, p. 1322.

Ta kontinuá otro siman