Hulanda no ta duna Pago di Reparashon pa sklabitut!

WILLEMSTAD/DEN HAAG. Parlamento hulandes no ta bai di akuerdo pa hasi pago di reparashon pa e papel di kolonisadornan hulandes den tempu di katibu i gabinete Rutte tampoko ta na fabor pa paga reparashon pe pasado bochornoso den nos historia.
Es más, gabinete Rutte no ta nada na fabor pa paga pa loke antepasadonan hulandes a hasi ku katibu i e tin apoyo di un mayoria formal den parlamento.
Loke Hulanda ta duna ta un kontribushon finansiero di 200 mion euro pa un fondo di konsientisashon, más 8 mion euro pa e konmemorashon anual dia 1 di yuli i 27 mion euro pa habri un museo nashonal di sklabitut den tempu di katibu.
E opinionnan ta dividi den parlamento hulandes kaminda e frakshonnan iskierdista den parlamento ta haña ku 200 mion euro ta muchu poko, frakshonnan derechista no ke ningun fondo pasobra no tin nada di tin bèrgwensa pe te pa paga kompensashon.
Pero mayoria den parlamento ta apoyá e punto di bista di gobiernu hulandes.
Kón lo gasta e fondo ta algu ku Hulanda lo determina den konsulta estrecho ku organisashonnan di Reino den Karibe i Surnam.
Organisashonnan ku ta aktivo riba e tereno di konmemora tempu di sklabitut por pidi supsidio pa organisá evento.
Di akuerdo ku minister di Enseñansa hulandes, Robbert Dijksgraaf kende siman pasá a bishita tur isla Antiano den Karibe, investigashon lo ta un parti importante den e proseso pa hasi nos hendenan konsiente di tempu di katibu.
Robbert Dijkgraaf a rekonosé ku den pasado sierto sektornan den pasado konsientemente a purba limpia e susesonan doloroso di tempu di katibu.
E minister a deklará esei den e debate di 10 ora ku a tuma lugá den parlamento hulandes e siman aki i kaminda promé minister i otronan a menshoná nòmber di e héroe di resistensia ku a lucha pa libertat di katibunan a referi na Tula diferente biaha.
Rutte a splika ku ela keda enormemente impreshoná pa aktuashon di Tula kende no solamente tabata un homber sabio pero altamente desaroyá tambe.
I esei den un tempu ku no tabatin Facebook i Whatsapp i no tabatin akseso na biblioteka i buki pa bo desaroyo.
Sinembargo tambe na 1795 Kòrsou tabata sa masha bon ki tabata pasando na Europa i p’esei Rutte a pidi respèt pa Tula i tur e nòmbernan grandi ku a lucha pa libertat di nos pueblonan.