Hulanda di akuerdo pa para rekorte di salarial di 12,5%

WILLEMSTAD – Sekretario di Estado Alexandra van Huffelen (Relashonnan den Reino) ke duna espasio na e paisnan pa para e rekorte di 12,5% riba salario. A introdusí e rekorte riba salario na mitar di aña 2020 komo konsekuensia di e pandemia di corona komo muestra di solidaridat den direkshon di e merkado i pa redusí gastu di gobièrnu na e paisnan. Sekretario di Estado ta haña ku awor ku kosto di bida diario ta oumentá mas i mas, mester rekonsiderá e rekorte salarial di 12,5%.
Sekretario di Estado Van Huffelen: “Kosto di bida normal a oumentá drástikamente último tempu entre otro pa motibu di e guera na Ukrania. Hopi hende ta lucha ku gastu haltu di por ehèmpel produkto di alimentashon i hür. Ademas, awor ku e ekonomia ta rekuperando e eksigensia pa redusí salario ku 12.5% no tin mesun peso mas kompará ku e oumento di kosto di bida. Banda di esaki, pa kontratá personal ta bira kada bes mas difísil, miéntras bon personal ta di gran importansia. Ku esaki mi ke duna e mandatarionan espasio pa segun propio ritmo, eliminá e 12,5%.”

E kondishon mas importante pa eliminá e rekorte di 12,5% riba salario segun propio ritmo ta ku mester kumpli ku e palabrashon hasí anteriormente pa realisá un norma pa e entradanan haltu (topinkomens) i e rekorte riba salario di polítiko ta keda eksistente. Durante di e reunion di konseho di minister di Reino dia 25 di mei lo atendé e tema di eliminashon di e 12,5%.
Otro siman, Sekretario di Estado Van Huffelen (Relashonnan den Reino) ta na e parti Karibense di Reino. For di djaluna 23 di mei te djabièrnè 27 di mei e ta biaha pa Aruba, Kòrsou i Sint Maarten pa topa i pa skucha kiko ta soño i preokupashon di abitante-, komersiante-, boluntario- i organisashonnan sosial riba e islanan.

SINDIKATONAN TA KONTENTU
ABVO: BON
NOTISIA
Den un promé reakshon, George Hernandez, presidente di ABVO, e sindikato mas grandi di empleado publiko, a bisa NOBO ku ABVO a keda hopi kontentu ku e partisipashon aki di sekretario di estado van Huffelen. Ku plaser ABVO a tuma nota ku e Van Huffelen a tumando nota dje sirkumstanshanan aktual riba e islanan i ku ta imposibel pa mantene e ekisgensia di rekorte di 12.5%. “ABVO tin hopi tempu ta bisa ku ta imposibel pa mantene e rekorte, si tuma na konsiderashon ku kosto di bida ta subi i tur kos ta bira karu’’. ABVO ta haña un bon desishon di sekretario di estado pa eliminá e medida aki, Hernandez a enfatisá.

STRAF: DUNA BEK
Pa sindikato STRAF, tambe esaki ta un notisia hopi alentadó. Juan Lourens, presidente di Straf: ‘’Paso ta berdat manera e sekretario di estado ta bisa, kosto di bida ta subi no por sigi hasi e empleado publiko mas poder’’. Lourens a bisa NOBO ku gobièrnu awor tan pronto posibel mester investigá e posibilidat pa duna e empleado publiko bèk, loke ku e tin algun aña kaba ta entregá.

NAPB
E sindikato di Polis, NAPB ta riba e mesun liña ku sindikatonan ABVO i Straf, ku ta un bon medida pa elimina e rekorte di 12.5%. Thaise Isidora-lo-A-Njoe, a bisa ku enberdat e forsa di kompra dje empleado publiko tambe , ta hopi afektá entre otro debi na oumento di kosto di bida ku a bira hopi karu.