Huan Pablo I lo bira beato: Papa Francisco ta rekonosé milager dor di su interseshon

Pa Blanca Ruiz | ACI Prensa

Papa Francisco a rekonosé un milager atribuí na interseshon di e Venerabel Siervo di Dios Huan Pablo I, pa kua e lo ser beatifiká.
E milager realisá pa interseshon di Huan Pablo I ta kurashon di un mucha muhé na Argentina.
Papa Huan Pablo I tabata konosí komo “e Papa de la sonrisa”, su pontifikado a dura únikamente 33 dia, un di esnan mas kòrtiku di historia di Iglesia.
Dia 9 di novèmber 2017 Papa Francisco a firma e dekreto ku a rekonosé Huan Pablo I a biba virtutnan kristian, di Fe, Speransa i Karidat, den moda heroiko.
Rekonosementu di virtutnan heroiko ta un paso largu i kompleho denter di e proseso di beatifikashon, pasobra e ta studia tambe di manera detayá bida di e kandidato.
Dia 13 di òktober 2021 Papa Francisco a rekonosé ku Huan Pablo I a intersedé den realisashon di un milager, pa kua lo por prosedé su beatifikashon.
Biografia kòrtiku
Albino Luciani a nase dia 17 di òktober 1912 den e lokalidat di Canale d’Agordo na Italia. A batis’é riba mesun dia un señora ku nòmber Maria Fiocco, dilanti “e inminente peliger pa su bida”, manera e sitio web di Vatikano ta señala.
E pontifikado di Huan Pablo I a kuminsá dia 3 di sèptèmber 1978 i a dura únikamente 33 dia, un di esnan mas kòrtiku den historia di Iglesia. El a fayesé 28 di sèptèmber 1978 den e Palasio Apostóliko di Vatikano.
Huan Pablo I, konosí komo e Papa di sonrisa, a ser skohé komo susesor di San Pablo VI dia 26 di ougùstùs 1978.
Su nòmber ta reuní esnan di su dos predesesornan inmediato. Tabata Huan pa San Huan XXIII, i Pablo pa San Pablo VI; komo un forma di homenahiá ámbos Pontífise ku a lidera e Konsilio Vatikano II, e evento mas importante di Iglesia den siglo XX.
El a partisipá den e promé kònklaf di 1978 den kua el a resultá elegí dia 26 di ougùstùs. 33 dia despues, dia 28 di sèptèmber, el a fayesé pa kousa di un atake di kurason den e Palasio Apostóliko di Vatikano.