Hopi tristu kon nos pueblo a trata ku e graf di Luis Brion

WILLEMSTAD. Drs. Trevor Bakhuis na final di su charla e siman aki pa Akademia Popular Errol Schoop, a sera su lès indikando un situashon hopi tristu i falta di patriotismo relashoná ku e manera ku a trata e graf kaminda ku nos éroe Luis Brion tabata derá.
Despues ku a saka e kurpa di Luis Brion i traslad’é pa e Panteon na Venezuela, no a dediká tempu mas na e graf di Luis Brion. A laga esaki para deteriorá i bai kompletamente atras.
Yerba ku nèshi grandi di maribomba a krese tapa e graf. Esaki ta muestra kla di falta di patriotismo di gobièrnunan di turno. Esaki ta un komportashon bergonsoso.
E siklo aki mester yuda promové e sentido di patriotismo i lanta sintimentu di orguyo di tal manera ku nos ta balorá, kuida i defendé nos patrimonionan i ta evitá ku e tipo di kosnan aki ta ripití.
Djadumingu 26 di sèptèmber partisipantenan ta bai den área di St. Martha pa será konosí ku patrimonionan masha bunita di Kòrsou pero ku lástimamente ta den man di strañero. Djaluna 27 di sèptèmber e siklo ta sigui ku dosente drs. Hubert Scherptong, ku ta bai amplia riba un vishon patriótiko pa ekonomia di Kòrsou.