Hopi motibu pa preokupá den sektor di hospitalidat

WILLEMSTAD – Bond Trahadornan Horecaf Kòrsou, ta hasi uso di su posishon komo representante di e trahadónan afiliá i no afiliá den sektor di hospitalidat, despues di a kumpli ku su Konseho statutario di Delegadonan djarason 24 di novèmber fecha ku Horecaf a kumpli 57 aña di eksistensia.
E Konseho a duna Komité Ehekutivo di Horecaf e mandato, pa entregá Parlamentu dos resolushon, ku ta trata e proyekto di ‘Service Charge’, i e proyekto di ‘Formashon’ pa trahadónan ku ta buskando trabou den e sektor di Horeca.
Pa kumpli ku e tarea di representante di trahadónan den e sektor di hospitalidat, i alabes pa kualkier informashon òf akshon ku sosodé, òf ku tin aber ku e sektor, prensa i otro instansianan ta aserká nos, p’asina nos duna komentario i nos posishon riba esakinan. Ta den e kuadro akí, Horecaf ta emití e relato akí, relashoná ku un análisis di e situashon i e impakto negativo ku e ‘vírus korona’ a hasi riba trahadónan den e sektor di horeca, basá riba e tantísimo kehonan ku nos á risibí i ta sigui risibí.
1.Kehonan di retenshon di 20% for di salario.
Pa loke ta trata e punto akí, nos a risibí reklamo i algun slep di trahadó pa nos duna nan splikashon, pasobra te ainda no ta kla pa trahadónan, kon e gerensianan ta kalkulá e retenshon di e 20 % akí. Nos ta na altura tambe, ku tin dunadó di trabou ku ta mantené nan mes na e sistema manera mester ta.
E sistema ta kla, ku no mester di retené nada adishonal, ku no ta e primanan mensual, for di e trahadó ku ta gana suèldo mínimo. Algun kaminda Horecaf ta komprondé, ku algun dunadó di trabou, únilateralmente a retené mas ku e 20% outorisá, i ni sikiera a debolbé e trahadónan e loke ku nan a retené di mas. Tin e sistema tambe, kaminda den sierto kaso ku konsulta i tambe sin konsultá ku e trahadó, ta kita dianan di fakashon, ku aki aya ta trese basta insertidumbre serka e trahadónan.