Hopi di e sabínan a bolbe faya

Hinter e asuntu rondo di ‘screening’ di kandidatonan pa bira minister a mustra ku hopi di esnan ku ta kere ku nan ta ‘don sabelo todo’ a faya drastikamente.
E kandidato ku ta sali bisa ku e lo bai korte si e keda rechasa, e asina yamá tata di e lei di ‘screening’ ku de paso e no ta, tur esnan ku a sostene i/òf a para tras di e kandidatura di e kandidatonan di kual nan mester tabata sa ku nan a ser kondená pa un delito (‘misdrijf’), tur a faya. Esei ke men ku nan ni a lesa e lei (na drechi).
Loke mi ke bisa ta ku prome ku a presenta e hendenan aki komo kandidato pa bira minister e dirigentenan di e partidonan mester a hasi nan investigashon (serka e kandidatonan mes tambe) pa sa si e kandidatonan tabatin un kondena pa un delito (‘misdrijf’).
Artikulo 7 di e lei di ‘screening’ ta bisa entre otro;’ De kabinetsformateur doet of bevordert geen voordracht tot de benoeming van een kandidaat, indien die zich niet verdraagt met de uitkomst van enig in artikel 2, eerste lid, bedoeld onderzoek, en voorts indien de kandidaat:
a. Is veroordeeld wegens misdrijf;’
b. […….]
E lei ta klaro i no ta papia mes di ku si e ‘strafblad’ por a kaduká. Pues na moda di bisa e kondena (‘veroordeling’) por a tuma lugá 20 aña pasá mes. Pues no mester a bin papia mes di ku e kastigu hañá (‘strafblad’) por a kaduká.
E artikulo di lei ta hopi rigido i no ta duna eksonerashon a base di ku e ‘strafblad’ por a ‘verjaar’. E lei no ta papia di ‘strafblad’, pero di un kondena (‘veroordeling’).
Mi ta bai generalisa i bisa ku tur hende tabata sa ku tin kandidatonan ku a haña kondena pa delitonan (‘misdrijf’) ku nan a komete. Si nan no a haña kastigu no ta importá, pero nan a ser kondená si, manera e lei ta bisa.
Na mi opinion ta na 2012 a hinka e aspekto di ser kondená pa un delito (‘misdrijf’) den e lei aki. Den e reglanan ku tabata ser mantene anteriormente mi no a mira un kondishon den e direkshon aki. Tambe mi ke menshona ku no ta akseptabel ku un (in)formadó ta kuestioná e lei di ‘screening’. E tin di hasi su trabou a base di e lei ei i si e no ta di akuerdo ku e lei, e tin di ninga e enkargo. Manera mi a yega di deklara riba sierto artikulonan di nos Areglo di Estado, ta parse ku e lei di ‘screening’ (‘Landsverordening Integriteit (kandidaat) Ministers’), tambe mester di algun splikashon mas leu i tambe sierto adaptashonnan.