Hopi boroto pa bringamentu na Marnix College, pero kiko awor?

E bringamentu teribel entre alumnonan di Marnix College, ku a keda filmá pa laga plama riba retnan sosial, a okashoná hopi krítika i gritunan di desaprobashon.

Ku e suseso aki un biaha mas a keda demostrá ku na Kòrsou mas i mas nos ta hañando nos konfrontá ku e tipo di aktonan violento kondenabel aki.

Den forma di batimentu, maltrato i abuzu kruel di un òf mas serhumano ta tuma lugá un espektákulo ku figuranan envolví ke laga mundu kompletu gosa di dje.
Masha remarkabel ta ku djis despues ku e bringamentu kaba di tuma lugá ta laga e imágennan sirkulá rònt Kòrsou pa bai te hasta den eksterior.

Ta komo si fuera e tipo di aktonan baho aki ta loke hende mester mira pa por sinti satisfakshon awendia.

Mester mira un otro siudadano sufri, sin por defendé su mes, sino tumando slanan fuerte sin mizerikòrdia. Bòftánan unu tras di otr
o te yega e momento pa e víktima basha abou den otro! Mal batí, kara kibrá i hinchá, anto leshoná na mas parti di su kurpa.

Ta na e ekstremo aki nos a yega na Kòrsou, despues ku a sòru pa no tin ningun sorto di maneho di hubentut mas, a deshasí di e departamentu di hubentut na Kòrsou. Atenshon pa e sirkunstansia den nos barionan di manera ku sikiera ta purba drecha algun di e kosnan ku ta bayendo robes, lubidá. Kada ken pa su mes i Dios pa nos tur, t’esei ta nos estilo di bida awendia tòg?
Remarkabel ta e hecho ku no ta sali ningun periodista, ni ningun polítiko, ningun parlamentario ku preguntanan skèrpi i òf ku sugerensianan konkreto pa para e susesonan bochornoso aki ‘for once and for all’ den nos skolnan. Tur opservashon ku keda hasí for di e skina ei mas bien ta kompañá ku un sous di sensashon. No pa resolvé nada, sino djis pa mustra e kosnan robes ku a pasa.
Kòrsou pa algun aña ta fiho, fiho riba e ruta di deterioro, pasobra sabínan djaki a haña ku no mester hasi nada na e sirkunstansia sosial na Kòrsou.

Meskos ku a sosodé na Ulanda durante e temporada di ‘bezuiniging’, nos aki na Kòrsou a kore kopia sin buska drechi, kita tur profeshonal for di trabou ku tabat’ei pa atendé ku problemanan ferfelu.

Anto awe nos ta kosechá e frutanan amargo.

Ta bèrdat ku e influensia di medionan sosial ta hunga un ròl (whatsapp, YouTube, instagram), pero ki maneho tin pa atendé ku nos hubentut i asina ei tòg duna sierto guia?

Kiko ta hasi pa nos barionan no ta ‘ghettonan’, kaminda for di chikí ta siña nos muchanan hòrta outo i plama for di otro pa por bende piesa? Bira miembro di gèngnan teribel i kana ku armanan di kandela pa hasi loke ta parse nan nesesario? Laga nos ta stret ku otro: “E problemanan ku ta presentá na Marnix College ta komo konsekuensia di e manera ku a disidí di manehá e isla aki, kopiando siegamente for di Ulanda den ehersisionan pa ekonomisá, sin buska drechi!”
Gobernantenan, parlamentarionan i demas lidernan mester sali padilanti, sòru pa profundisá den loke ta pasando i presentá ku solushon, pasobra ta p’esei nan tei. Tambe mester por ferwagt ku periodistanan ta asumí un posishon kritiko pa kuestioná esnan ku ta duna e oportunidat pa kosnan robes sigui tuma lugá. Apsolutamente no por ta ku e periodista tei pa gosa di sensashon rondó di kosnan tristu i doloroso den nos komunidat i únikamente ta buska manera di bende esei. Ta momento pa rápidamente duna periodistanan na Kòrsou maske ta un tiki training i òf te hasta introdusí un instituto di formashon, pasobra kueste loke kueste mester evitá ku komunidat di e isla aki ta sigui deteriorá i hañ’é den muchu mas bagamunderia, kaminda e ola i tendensia di falta di étika i moral ta mas fuerte ku nunka. De paso un palabra di felisitashon pa e gremio di fotografnan den prensa, ku na kabes señor Rilley Ignacio, kendenan en bloc a bisa ta basta ku sakamentu di portrèt di damitanan medio sunú, ku pechu afó, pañanan super pèrtá na kurpa. T’esei ta loke tabata pasando den temporada di karnaval na Kòrsou tòg? Enfin, e fenómeno baho i kruel di bati otro studiante na porta di skol, anto filma manda rònt den medionan sosial ta inaseptabel i mester par’é den tòm. Ken lo ke mira filmashon di su yu, ruman, primu òf bon amigu bentá na suela, siendo otronan ta batié ku skòp i moketa? Nos lo no por ke un Kòrsou asina ei.

Erwin Raphaëla