Hòmber ku a tira Takeoff di Migos mata a keda arestá

HOUSTON – Troy Finner hefe di kuerpo polisial na Houston a konfirmá detenshon di e fugitivo di hustisia ku a tira Kirsnick Khari Ball mihó konosí komo Takeoff di e agrupashon Migos mata.
E hòmber ku a tira Takeoff mata a keda identifiká komo Patrick Xavier Clark (33) na un luga bandoná na Houston.
E kaso di asesinato di Takeoff a tuma luga dia 1 di Novèmber di aña 2022 na un fiesta di kumpleaño.
Aparentemente durante un wega di dou tabatin un diskushon entre tio di Takeoff i Patrick Xavier Clark ku a saka un arma di kandela i tira hende robes mata.
Patrick Xavier Clark a keda enkarselá pendiente pa wes disidí ku elo imponé un fiansa pa libertat kondishonal.
Kapitan Troy Finner a bisa ku ta trata aki di un kaso trágiko ya ku tur e hendenan aki tabata supuestamente bon ku otro i ku esaki mester a kulminá den algu trágiko asin’aki pa un wega di dou ku tabatin bastante sèn envolví aden.