Homber a pidi Bijstand pero no tin ni yabi di kas!

WILLEMSTAD. Awor sí e impreshon ta reina ku tin asina tantu Yu’i Kòrsou ta biba na Ulanda ku e promedio di kantidat di kosnan straño ku nan ta hasi ta muchu mas variá i frekuente ku na Kòrsou.
Resientemente munisipio di Rotterdam a ninga petishon di laga nos yamé Chebu pa protehá su identidat ku a bai pidi Bijstand.
Pa nan check si e por haña Bijstand, nan kier a bishita kaminda e ta biba pasobra su datonan di vivienda no tabata kuadra.
Ku rason e amtenarnan a pidi koperashon di Chebu pa bishité na kas.
Nan a bisé tambe ku si e ninga, esei por tin konsekuensia pa su petishon pero dia nan a yamé pa papia, e no a presenta. Mientras tanto nan a saka afó ku e tin 7 aña ta kobra Bijstand a rason di kas 800 Euro pa luna komo soltero.
Riba e formulario ela yena ku e ta biba serka un amigu i ku su adres ta registrá na kas dje amigu.
Munisipio a pidié mas informashon i a invité pa un kombersashon.
Den e kombersashon Chebu a bisa e amtenar ku e doño di kas no ta di akuerdo pa e risibi e amtenar.
Es mas, e doño di kas no sa nada di su petishon pa Bijstand i lo no keda kontentu. Munisipio a rechasá su petishon pa Bijstand pasobra e no a koperá.

DERECHO RIBA BIJSTAND

Na Ulanda, un hende ku pidi Bijstand mester demostrá ku e tin derecho riba Bijstand.
E tin ku duna nan tur su selashi finansiero i kon e ta biba. Despues munisipio tin ku kontrolá loke ela konta. Chebu a bisa nan ku nan tin tur su datonan kaba i no tin motibu pa duda den dje.
Pero ora e amtenar a bishita Chebu, e no tabata sa mes koló di flur.
Riba e pregunta kiko tabatin riba suela dje dormitorio e no por a kontesta pero ku e kamber tin kortina i no bentana di glas.
E’n tabata sa koló dje kama ni kiko tabatin riba e kama i riba e pregunta ku si e no sa haña karta, Chebu a kontesta ku e ta bai tur kaminda ku su mochila pasobra e no ta konfia ningun hende.
Chebu a mustra e amtenar dos yabi i un ela haña e dia anterior i ku e doño di kas tabata na Kòrsou ku fakansi pero ora a puntra Chebu kon e tabata drenta kas, Chebu no kier a kontesta.
Despues Chebu a tene un litania ku si nan drenta e kas nan ta viola su Derechonan Fundamental Humano.
Na final a disidi ku Chebu tin ku paga e vorskotnan ku ela haña kaba i keda trankil pa nan no sigi kobra kiko e ta hasi pa bida.