Homber a bai korte pa repartishon di bienes sin papel pa proba nada

WILLEMSTAD. Relatonan di kasonan di korte ku prensa ta relatá no nesesariamente ta pa yena pagina ku teksto pero ku alabes ta sirbi komo material pa lektornan siña for di loke abogado i wesnan trese dilanti pa si akaso algun dia nan haña nan dilanti wes, sikiera nan a haña orientashon riba e materia ku nan ta bai atendé.
E siguiente kaso ta unu kaminda no solamente un hende lo puntra ta unda e homber ku a bai repartí bienes dje matrimonio dilanti wes por a bai su so pasobra sikiera e no tabata mal akompañá manera den e kaso aki.
E homber tabatin un abogado ku a lag’é bai dal su kurpa dilanti wes pasobra nada di loke ela pidi e no tabatin dokumento pa proba ku ta su mitar dje patrimonio ku ela bai reklama den korte.
Wes a trata e kaso un biaha kaba pero pa tur sigur a puntra e pareha ku nan ta insisti pa divorsia i reparti bienes 50-50.
E promé punto ku wes a toka ta ken lo keda ku e kas i mobilario.
E pleitamentu kiko ta di ken mes tabata un kaso riba su mes pero wes a kòrta diskushon rapidamente ora e señora a reklama ku e homber a bai ku kantidat di mobilario sin su pèrmit i ku pió ainda, a tira nan afó pero na momento di bèrdat e señora tambe a atmiti ku ela tira algun opheto di kas afó of a bende nan.
Unabes ku ningun dje dos hendenan no por a bisa ken a tira kiko afó, wes a skrap pa disidi ken ta keda ku kiko.
E wesu grandi mes tabata e kas den kual e pareha tabata biba.
Wes a kere ku e homber lo a bin ku e aktanan di kompra i venta dje kas pero e no a hasi esei. Na lugá di akta di propiedat. ela bin ku un aanslag di Grondbelasting di aña 2030.
Riba e Aanslag tabatin Cribnummer dje homber pero no su nomber. Wes a laga e dato aki pa loke e tabata pasobra e no por a hasi nada ku kopia di un Aanslag bieu.
Pero loke sí wes a hasi pa no laga e kasa para plama den otro, ela duna e homber chèns pa bai saka un dokumento Kadaster pa saka afó na nomber di ken e kas tabata.

KUENTA DI
BANKO
Otro problema kabuya tabata kuantu dje plaka ku tabatin riba e pareha su nomber na MCB ta dje homber i kuantu dje muhé.
E homber a splika ku banko no ta duna e kopianan ei pero wes a rekomend’é pa bai ku e dokumento di korte i laga deurwaarder eksigi e dokumento.
Wes a duna e homber tur chèns pa proba ku e kuenta ta di dje pasobra e debe banko pero no tabatin otro prueba sino un karta di saldo, wes a asigná e debe na e homber.

USO DI KAS
NO TA GRATIS
Unabes ku e pareha definitivamente lo divorsiá mester anotá ken debe ken kuantu pa uso dje kas.
Wes a fiha alkiler dje kas riba 1433 florin pa luna i durante 224 luna esei a bira
NAF. 34,399,92.