HÓBENNAN DI INSTITUTO HUDISIAL A KABA ESTUDIO NA KOLEGIO HÓBEN POSITIVO

WILLEMSTAD – Sinku hóben ku tabata permanesé den Justitiële Jeugd Inrichting Curaçao (JJIC), antes GOG, a risibí nan diploma komo prueba ku nan a finalisá nan estudio ku éksito.
Kuater di nan a kaba VSBO i unu a finalisá AGO. Di e forma akí e hóbennan a dal un stap mas den direkshon di nan metanan.
Tur habitante di JJIC ta hóben ku obligatoriamente mester ta den e instituto pa un temporada definí dor di outoridatnan.
Intenshon ta pa nan haña guia pa por bai kas bèk ku un aktitut i oportunidatnan mas positivo.
Un parti di e guia ku e hóbennan di e instituto ta haña ta enseñansa.
Riba tereno di JJIC tin un skol “Kolegio Hóben Positivo” kual ta kai bou di Dienst Openbare Scholen (DOS). Hóbennan por sigui skol tantu riba nivel AGO komo VSBO, grupo 1 te ku 4.
Ounke e hóbennan menshoná a terminá nan estadia den JJIC, tòg nan a siguí bini e skol tur dia i a terminá esaki ku éksito pa yega mas i mas serka di nan meta.
JJIC ta hopi òrguyoso, no solamente di e alumnonan menshoná, pero tambe di tur esnan ku a pasa e aña eskolar aki ku éksito.
JJIC ke enfatisá ku un ambiente sano, trankil i strukturá, ta hasi e posibilidat mas amplio pa nos hóbennan por traha riba nan mes.
Minister di Hustisia e entregá dia 5 di yüli último algun pin di ‘E bon Yu di Kòrsou’ na empleadonan di ántes GOG, pa e trabou inkansabel ku nan ta hasi tur dia.
Esaki spesífikamente durante e periodo di COVID-19 i e preparashonnan pa último menasa pa tormenta tropikal.
Apesar di e situashonnan krítiko, e personal a sigui bai trabou pa duna guia na e hóbennan den e instituto. Durante tur e añanan ku e trahadónan ta ehersé e trabou, ta bisto ku ta hasi esaki ku amor i dedikashon, mientras ta pone e hóben na promé lugá.
Mirando esaki, minister a haña na su lugá pa duna kada un trahadó un muestra di su gratitut ku un pin di ‘E Bon Yu di Kòrsou’.