Helikòpter ku shete persona abordo a disparsé na Italia

ROMA – Un helikòpter ku shete persona abordo inkluyendo e piloto i seis miembro di tripulashon a desaparesé na provinsia di Lucca ku ta un region turístiko na parti nortost di Italia.

E helikòpter a lanta buelo na e aeropuerto Arturo Ferrarin de Thiene Capannori na Lucca i tabata dirigí na e zona turístiko ku yama Treviso ku ta keda na parti nortost di e pais.
Na momentu ku a pèrdè e helikòpter for di radar agentenan di departamentu di aviashon na Treviso a bati alarma na outoridatnan.

E ora di desaparishon di e helikòpter aki tabata na alrededor di ayera 4’or di tardi.
Tin indikashon ku tur e seis miembronan di tripulashon tabata empresarionan ku a kaba di atkerí un propiedat na e zona di Treviso pa bai konstruí un mega hotel.
Ta trata aki di un zona turístiko kaminda míles di turista ta bishita durante hinter aña.
Lokual ku por a kousa ku e helikòpter aki a kai ta ku tabatin mal tempu i asina mes a pone preshon riba e piloto pa transportá e 6 empresarionan ku mester a yega Treviso pa un kompromiso.