Habri vakatura i modernisá e aparato gubernamental

WILLEMSTAD. E miembro di parlamento Ramón Yung  pa frakshon di MFK for di aña pasá i tambe e aña aki a tuma nota di un kantidat di empleado públiko ku a hasi uso dje areglo di VVU.
Un kantidat di alrededor di 780 empleado públiko por a bin na remarke pa hasi uso dje areglo di VVU, pero finalmente no ta tur a hasi uso dje oportunidat aki.
E areglo di VVU tabatin komo meta pa yuda den redukshon di gastu dje aparato gubernamental i mester a sirbi pa yega na un aparato mas efisiente i moderno, hasiendo uso di teknologianan di digitalisashon i tambe outomatisashon.
Tambe e proseso lo mester a kontribuí pa redusí e envehesimentu den e aparato, kreando asina espasio pa atraé personal hóben ku un grado di preparashon haltu pa di tal forma garantisá un funshonamentu optimal dje aparato den futuro.
Redukshon dje aparato públiko, tabata un dje kondishonnan ku Ulanda a mara na e dunamentu di sosten finansiero. Den e kuadro aki a inkorporá esaki den e “Landspakket”, den kual ta papia di un plan pa “motivashon i halsamentu di produktividat dje amtenarnan”.

Tambe a kumbiní ku pa kada tres empleado públiko ku hasi uso dje areglo di VVU, lo por tuma un empleado a base di funshonnan krítiko.