Grupo mionario ke sera laboratorio nashonal

WILLEMSTAD – Parlamentario Elvin Gerard (PNP) ta konvensi ku tin un netwerk ta traha pa sera Laboratorio Nashonal, ADC. Ta pesei gerensia di CMC mester bai Staten pa splika e motibu real dikon ku e no ke traha mas ku e laboratorio nashonal.

Curacao Medical Center a informa Laboratorio Nashonal, ADC enkuanto su intenshon pa deskontinua ku e kontrakt ku e tin ku e laboratorio. Gobièrnu ta na altura ku CMC a hasi e proposishon aki i gobièrnu tin su pensamentu tokante e posishon di CMC. Relashona kon e relashon di trabou ta bai aworaki, CMC ta bisa ku e no ta gusta sierto trabou ku ADC ta hasi, entre otro resultadonan di testnan ta tarda pa drenta.
Na 2017-2018, a disidi ku ta mara un laboratorio na un hospital. Den SEHOS tambe tabatin un laboratorio. Pero e laboratorio no por a muda ku e hospital pasobra e ta muchu chiki. Ademas e laboratoio no tabata amplio manera esun di ADC.
Personal di laboratorio di SEHOS a bai den ADC ku a parti parti di CMC. Esei tabata e palabrashon ku ta dura sinku aña. E akuerdo ta kaduka na 2024. ‘E pensamentu ta ku na 2024 ta prolongá e koperashon pa un periodo nobo di 5 aña. E intenshon ta pa ora òf prome ku 5 aña yega, evaluá desaroyo dje koperashon.

BOIKOT
Segun Elvin Gerard e kaso aki tin di haber ku bòikot kontra di ADC. E siman aki e parlamentario a bishita i hana un presentashon na ADC. For di esei e no por a konklui ku nada ta bai robes na e laboratorio nashonal. ‘’Tin un grupo minario ku ta desea pa sera un kompania ku tin hopi ana ta duna servisio na pueblo di Kòrsou’’. Gerard no ta mira motibu dikon CMC ke stop di traha ku ADC.
Segun e parlamentario di PNP, prome minister a indika kaba ku no ta bai permiti pa gerensia di CMC, stop di traha ku ADC i ku e ta sostené e posishon aki kompletamente. ‘Mester top di korumpi Korsou’.
Gerard ta determina pa aserka su koleganan pa reuni riba e asuntu aki.