Gran robo di vurwerk na 2020 lo ta den korte atrobe 24 oktober

WILLEMSTAD. Djaluna 24 oktober korte di promé instansia lo reanudá tratamentu di e kaso dje empresa “All Kind of Business N.V.” kontra gobiernu di Kòrsou pa daño i perwisio.
E kaso tin un aña kaba en tratamentu den korte i ora wes a disidi ku mester trata e kaso dia 9 di februari ultimo, un dje direktornan di Ministerio di Verkeer en Vervoer a pidi pa posponé e komparishon.
A fiha fecha pa trata e kaso dia 7 di mart ultimo pero representante di gobiernu a bria pa su ousensia pero e kompania sí a manda un apoderado.

IMPORTASHON
DI VURWERK
E negoshi ta importa vürwèrk na okashon di show grandi i ta warda e vürwèrk den un deposito den kònteiner na Kruithuis na Brievengat.
Openbare Werken ta responsabel pa e kònteinernan. Tres aña pasá AKB a importa 1.195 paki di vürwèrk pa un montante di US$ 22.665,09. Den e kònteiner na Kruithuis tabatin huntu ku e merkansia un lista di inventario ku funshonarionan di SOAB a kontrolá.
Riba e lista di inventario a registrá 192 kaha i 709 pida vürwèrk.
Dia 8 di november 2020 ladronnan a hòrta den e dos kònteinernan di AKB na Kruithuis.
Mesun dia direktor di AKB a hasi denunsia di ladronisia i informa ku e 35 kahanan ku e ladronnan a hòrta i 130 kaha mas di vürwèrk su balor ta NAƒ 115.000.
Despues ku reshèrshe a resolvé e kaso nan a retorná 112 paki di vürwèrk i e kompania a tene gobiernu responsabel por eskrito pa e robo.
E kompania a demanda gobiernu pa un suma di NAƒ 210.191,76 pasobra gobiernu tabata responsabel pa warda e vürwèrk manera debe ser.
Na tur nan a demanda gobiernu pa NAƒ 210.190,96 di kual 125.000 florin tabata pa daño na nan reputashon.