Gradisimentu na ROP, Domein, KPC i MEO pa nan presensia na Daaibooi

WILLEMSTAD. Koperativa Piskadónan di Daaibooi (KPD) habitantenan di Willibrordus I besindario ta sumamente kontentu i ta gradisí e tim multidisiplinario ku ta konsistí di ROP, Domein, KPC i MEO, pa nan presensia na Daaibooi,
Sigur 1 aña KPD na nomber di habitantenan di Willibrordus i besindario ta kanando serka gobièrnu tantu ministerio di GMN i VVRP pa un iregularidat i akto ilegal ku ta tumando lugá na playa di Daaibooi. Un komersiante hulandes europeo a pone dos kònteiner na entrada di e playa i a komberti esakinan den un edifisio ku ta mahos bista pa e playa.
Aparte di e mahos bista a hasi destrukshon na naturalesa pa por akomodá e dos kontainernan akí. Ku ponementu di e dos kontaineranan akí riba e tereno pa parker outo a kita sigur 8 lugá di parker ku usuarionan ta uza na e playa.
E negoshi di sambuyá akí, a bini ta operá mas ku un aña kaba sin e pèrmitnan nesesario esta:
· sin “aanlegvergunning”, *
· sin “bouvergunning”,
· sin “vestigingsvergunning”
· sin “hindervergunning” I
· sin un akuerdo ku gobiernu pa por hasi uzo di e playa pa por hasi su negoshi. Durante bishita di e tim multidisiplinario na Daaibooi, a konstatá tur e iregularidatnan akí i a sera e negoshi i para e operashon mes ora. KPD sigur ta di akuerdo pa tur hende hasi negoshi, pero den un forma legal i korekto. Ku paramentu di operashon di e negoshi klandestino i ilegal akí, pueblo di Willibrordus i besindario ta hopi kontentu i lo sigui vigilá e situashon akí.
Un biaha mas un gradisímentu ta bai na e tim multidisiplinario, pa nan trabou hasi i por bisa ku sano wisio a prevalesé.