Gobièrnunan di turno a stroba hopi projekto na Prisòn

WILLEMSTAD – Mandatarionan na turno tin falta ku varios projekto na Prisòn no a kontinua. Esaki ta un dje konklushonnan di Urny Floran, direktor di SDKK, ku dia 1 di augustus awor ta baha ku penshun, despues di 42 aña di servisio den gobièrnu. E ultimo 21 añanan, Floran tabata direktor di Sentro di Detenshon i Korekshon,
Dia 1 di juli 1980, Urny Floran a drenta servisio di Kuerpo Polisial. Na su entrada den gobièrnu, a indika na Floran ku e por baha ku penshun ku 50 aña, despues esei a kambia bira 55, 60 i awor ela bira 65. Pero aworaki Floran por hasi uso dje oportunidat ku gobièrnu ta duna pa prome ku hasi 65 aña, baha ku penshun, pa medio di e asina yamá ‘’Areglo di VVU.’’
Mirando bek riba e 21 añanan komo direktor di SDKK, Floran ta bisa ku durante di su añanan di servisio di gobièrnu, ela sigi hopi trajekto. Lamentabelmente tabatin hopi plan ku a kuminsa kune pero no por a haña kontinuidat dor di mandatarionan na turno. Esei ta nifika ku ora ku kuminsa ku algu kada bes ku bin un gobiernu nobo, den algun kaso, un gobièrnu ku rapidamente ta sigi e otro, ta kibra e loke ku tabata traha riba dje.
Un di e kosnan ku a dal Prison hopi duru tabata, durante prinsipalmente e delaster 10 añanan, ta e hecho ku for di 2012, no ta permiti pa tuma personal den servisio di gobièrnu. Pa Prison esei ta nifiká ku no tin remplaso pa e mas ku 120 hendenan ku a sali for di servisio di Prison.
Segun Floran, tin departamentu den e instituto kaminda ku tabatin 24 hende ta traha i awor ta solamente 8 empleado tin. Na otro departamentu tabatin 12 hende ta traha i aktualmente tin solamente 3 hende ta funshona den e departamentu en kuestion. Floran a bisa ku ta trata tambe di departamentunan kaminda ku no ta eksigi hende ku sierto estudio pa traha, pero no por yena e vakaturanan, debi na e paro general di gobièrnu.
Konsekuensia dje situashon aki ta, ku personal di Prison no por duna e servisio manera e ta desea. Entretantu e peso ta keda kai riba esun ku ta na mando den e instituto i no riba esun ku a tuma e desishon aki. Ta lamentabel segun Floran, ku no ta drecha e posishon huridiko di e personal, ku ta wanta for di 2009. Gerensia di Prison ta bringa duru pa realisa e adaptashon dje posishon huridiko dje personal, pero e no ta logrando, debi na medionan finansiero.
E aspekto di presupuesto di SDKK tambe ta motibu di preokupashon pasobra tur ana Prison ta risibi menos fondo. Tin komprenshon ku e situashon finansiero di pais no ta bon, pero pa e peso di trabou na e instituto, ta importante ku e fondonan finansiero ta disponibel. Entre otro Floran a menshoná e edifisio di Prison, ku a konstrui na 1960 ku awor tin hopi defekto. Entre otro tin blòknan kaminda ku e WC no ta flush, loke ta un situashon hopi a-higieniko. Dos siman pasa parti di un plafònt di blòki a kai riba un trahadó. No tin sen tampoko pa resosialisashon. Tin desishonnan ku mester kai pa e direktor i tambe e personal por hasi su trabou, Floran ta bisa.
E personal di SDKK ta hasiendo bon trabou i ta traha trabou di mas ku 1 hende, durante oranan largu. Floran ta boga pa tan pronto posibel trese kambio den e situashonnan aki.