Gobiernu tin ku paga…… Desishon a kai na Kòrsou pa laga operá prezu na Aruba urgentemente

WILLEMSTAD. Resientemente Korte di Hustisia Komun na Kòrsou a trata e petishon di un homber ku ta será na Aruba den KIA. E homber di 44 aña ta sufri di un enfermedat ku yama varicocèle (den segundo grado) i de fakto dokter mester a oper’é masha tempu kaba pero sin outorisashon di gobiernu gerensia di prizon no por laga operá e homber.
Ela buska un abogado pa demanda gobiernu pa nan move nan yangadó i tuma un desishon i a logra esei ora ku siman pasá Korte na Kòrsou via video a trata e kaso i a ordená gobiernu pa mas pronto posibel laga operá e prezu. Plaka no mester ta un faktor pa keda sin operá e prezu.

· VARICOCÈLE
2DO GRADO
Primeramente un splikashon mediko di kiko ta varicocèle. Esaki ta un breuk den scrotum kaminda tin un akumulashon di spatader. (Scrotum ta popularmente yamá ‘saku di webu’) i un varicocèle ta un spatader dje saku i generalmente ta benigno ku ta surgi ora mucha homber bira adolesente i ku ta afektá komo 15% di tur mucha homber. E kousa ta ku e ardunan chikitu den e saku no ta funshona bon i ta forma manera un saku di bichi pero ku no ta doloroso. E kondishon aki por kousa impotensia i ta pa kasualidat dokter por deskubri nan pasobra e no ta hasi doló pero preferiblemente operá e masa di ardu ku e ta forma.
E kabayero ku ta sufri dje afekshon aki a demandá gobiernu di Aruba i Korte di Hustisia na Kòrsou a trata e kaso na Kòrsou via video i ta meskos ku tur hende tabata huntu den un sala.
Prokurador general na nomber di gobiernu a indiká ku e ta di akuerdo ku mester operá e homber urgentemente pero e no ta di akuerdo pa kobra gobiernu un dwangsom den kaso ku gobiernu no outorisá e operashon.
Di otro banda abogado Ecury a splika korte ku e demanda di dwangsom ta nesesario pa obligá gobiernu pa move i tuma akshon.
Korte a konstata ku e prezu ta den su derecho pa hasi un petishon asina i Korte i ku e prezu ta sufri doló insoportabel i su spèrma por bira steril.
Dokter di prizon Rodriguez Robert a manda un nota bisando ku mester operá e prezu mas pronto posibel pa evitá mas komplikashon pasobra mester a oper’é for di 2018.
E siruhano dr. J.A. de Cuba tambe ta komparti e opinion aki.
Inisialmente e kaso a dal den e problema ku lei penal no konosé un areglo ku ta pèrmiti pa prizon paga pa un operashon asina pa urgente ku e operashon ta.
Korte sinembargo ta konsiderá ku e frase di lei penal ku ta papia di bon aplikashon di lei penal ta kubri for di momento ku a investigá e sospechoso te na momento ku ela haña kondena i ta kubri desishonnan di wes.

KUIDO MEDIKO ADEKUADO
E lei ku ta goberná kon ta sera hende ta bisa ku kada prezu tin derecho riba un kuido mediko adekuado riba kuenta di gobiernu.
E pre-historia ta proba ku mester a operá e prezu masha tempu kaba te ku a yega momento ku mester oper’é mas pronto posibel.
Esaki a habri kaminda pa Korte di Hustisia mes tuma un desishon ku mester operá e homber mas pronto posibel pero no ta uza dwangsom komo palu tras di porta pasobra hasta e representante di gobiernu a indiká ku gobiernu ta realisá ku mester operá e homber mas pronto posibel.
Por lo tantu Korte ta asumi ku gobiernu lo respetá un desishon di Korte i ehekutá esaki mas pronto posibel.
Asuntunan finansiero di atministrashon di prizon no mag ta un traba pa ordená e operashon mas pronto posibel.
Asina Korte a disidi pa gobiernu sòru pa laga operá e homber mas pronto posibel.
(*Spatader den scrotum ta un fenómeno patológiko frekuente serka homber i e yama varicocèle. E ta un menasa skondí pa salú di homber i no por posponé su tratamentu of operashon. Si no trata e kondishon aki e homber no por forma un famia).