Gobiernu ta persisti pa nombra: Direktor di empresa di gobiernu komo komisario den otro empresa semi-gubernamental

WILLEMSTAD. Minister Charles Cooper a postula señora Jacqueline Jansen komo miembro di hunta di komisario di CTDM N.V., – Curacao Television & Data Management N.V.
E postulashon di señora Jansen den e funshon ei ta konta ku aprobashon di SBTNO, organo konsehero di gobiernu kende a husga señora Jansen kompletamente kompetente pa ehersé e funshon konsiderando su preparashon profeshonal.
Loke sí Konsehero di gobiernu no ta di akuerdo kune ta ku kada bes i más i más ministernan ta rekomendá e mesun hende pa bira komisario den diferente kompania semi gubernamental.
Den e kaso aki señora Jansen ta miembro di hunta di Stichting Economische Ontwikkeling (S.E.O.) i ta miembro di hunta di Curaçao Drydock Company/Damen Shiprepair.
Esei ta un opheshon ku Konsehero di gobiernu mr. Donny de Palm tin pero e ta bolbe remarká ku for di 2010 gobiernu i e respektivo ministernan ta violá Kodigo di Kondukta di gobernashon ku nan a heredá di hopi gobiernu anterior.
Di parti di redakshon di NOBO nos ta señalá ku outoridat dje kaso ku ta un sekreto publiko ku ta den seno di alto mando di partido politiko ta disidi kua simpatisador politiko ta bira komisario den kompanianan di gobiernu.
Nada di e ultimo aki tin di haber ku señora Jansen pero mas bien ku e hecho ku gobiernu den su totalidat tin ’schijt’ ne regla ku masha dia mester a lanta un mekanismo pa tene solisitashon abierto pa interesadonan ku ke bira komisario i tene un selekshon transparente.
No ta pasobra awe minister Cooper a proponé pa señora Jansen bira komisario na Telecuracao sino pa dékada ta halando atenshon riba e detaye aki kada bes ku ta rekomendá komisario den empresanan di gobiernu.
Pa kasualidat den e kaso aki señora Jacqueline Jansen kende por lo demas tin un kurikulo profeshonal i un karera di 33 aña komo eksperto finansiero di kual tantu aña komo direktor di Curinde.
Of manera Konsehero di gobiernu a señalá, e ta bolbe rekordá minister Cooper ku pa independensia dje komisario no ta rekomendabel pa nombra direktor di un N.V. semi gubernamental komisario den un otro entidat of empresa di gobiernu.