Gobiernu ta pagando pa un hospital ku no ta di dje

WILLEMSTAD. Mientras ku gobiernu ta paga e kuotanan dje debe multimionario i interes riba e fiansa pa a traha hospital nobo, gobiernu mes no ta doño di e hospital.
Ta sosode ku (ken??) a traspasa e edifisio na HNO V&B sin ku a firma un akuerdo di fiansa entre gobiernu i HNO V&B.

Sikiera nan por a firma ku e hospital ta para borg pa e pagonan ku gobiernu ta hasi.
No tin ningun areglo kon HNO V&B ta bai paga e plaka bèk.
Pa kamuflá e omishon aki di un manera torpe direktiva di HNO V&B aña pasá 16 di mart unilateralmente a traha ‘pagaré’ (schuldbekentenis) riba kual sin konsulta ku gobiernu nan a paga 4xNAf 1,56 mion pa luna ku tabata 3,3 mion di amortisashon i 3 mion florin na interes.
Pa regla den trafiko komersial sivilisá dos partido ta kumbini kuantu e debe ta i kuantu e debedó tin ku paga na kuota tur luna.
Gabinete Rhuggenaath ku a hunga un papel masha kuestionabel den henter e transakshon aki no a formalisá e areglo pa HNO paga gobiernu pasobra e suma ku mester a fia tabata kuestionabel.
Ku otro palabra: bira kara hunga siegu.
Ayera un instansia di gobiernu a anunsia ku gobiernu aktual lo laga formalisá e areglo mas pronto posibel pasobra e forma ku a atendé e kos aki ta mas iregular ku un saku di plèstik yen di aire.