Gobiernu no por pèrmiti forma di “bullying” na Gabinete Plenipotensiario

WILLEMSTAD. Ku un energia atmirabel i vigoroso e parlamentario Sheldry Osepa ta kumpliendo ku su deber pa apoyá kousanan noble den nos pais i alabes denunsia situashonnan ku ta violá prinsipionan basiko i nos demokrasia den su dependensianan.
Siman pasá ela bolbe risibi informashon informashon tokante e situashon na e gabinete di
Minister Plenipotensario na Hulanda. Ta parse ku e situashon akí meresé atenshon agudo.
E informashon ku suskrito a risibí ta trata di un forma di “bullying” fastioso.
E informashon ta asina chokante ku e no ta kuadra den e maneho di gobièrnu i p’esei no por pèrmiti e tipo di akusashonnan akí sigui biba.
Den pasado resien tabatin hopi disgustu na e kabinete di Minister Plenipotensario i no por
pèrmití e tipo di disgustunan akí atrobe i na momento ku Osepa a skucha e doló di e trahadónan, esaki a hasi un impakto grandi.
Ora ku por ehèmpel un mama ku dos yu preshoná síkikamente, tuma retiru boluntario pa evitá di aseptá kosnan straño, esei ta lanta hopi interogante.
Osepa huntu ku un kolega a analisá un parti chikí di e situashon akí den e vlòg: “Den Reses”.
E programa riba internèt akí ta pasa tur djamars i djaweps dos’or. Komo parlamentario Osepa a vosiferá e doló di e trahadónan públiko. Esaki ta konta sigur si konsiderá e trabou meritorio
ku trahadónan públiko ta desplegá tur dia.
Na momentu ku tin lo mínimo indikashon ku amtenarnan ku sagradamente ta gana nan pan
pa kria nan famianan ta wòrdu di ‘bully’ dor di polítikonan, ta obligashon di tur representante di pueblo, pa atendé esaki.

Nos no mag aseptá nunka ku ta krea un kultura di miedu i un ambiente di opreshon pa trahadónan di gobièrnu.
Na momentu ku esaki bini dilanti ta nos obligashon pa kontrarestá esaki den e forma mas kategóriko ku ta eksistí.
Ta nan tarea tambe pa analisá e situashon kabes friu i purba ku tur forsa pa krea un atmósfera i ambiente sigur pa empleadonan públiko.
Kualke otro eskoho lo dislusí e maneho i meresé atenshon. Ora un amtenar sklama su doló, nos mester krea un kultura di oído i nunka mata e mensahero. Den
kuadro di e situashon na e gabinete di Minister Plenipotensario na Hulanda mester evitá tur duda i trese e klaridat nesesario.