Gobièrnu mester instalá un komishon multidisiplinario di ekspertonan pa profundisá den climate change

WILLEMSTAD – E fenómeno di kambio klimatológiko ta surtiendo efektonan negativo riba práktikamente tur tereno. Durante programa Bario pa Bario di djadumingu último (4 di sèptèmber) ku komo invitadonan dòkter Yves “Payo” Schoop i mr. Curt Belfor di Bureau Telecommunicatie en Post (alabes formando parti di Institute for Professional Excellence I.P.E) a bini padilanti e sugerensia pa gobièrnu rápidamente instalá un komishon multidisiplinario di ekspertonan pa profundisá den e konsekuensianan di kambionan klimatológiko. Subida drastiko di temperatura ta kousa oumento eksplosivo di insektonan, manera sangura, muska, kakalaka etcetera, loke ta fomentá sierto malesanan.
Departamentu di Salubridat klaramente mester ta envolví for di un prinsipio pa atendé aspektonan ku ta konserní salú di pueblo.
Ademas mester hiba un maneho di limpiesa i higiena rígido pa Kòrsou, segun señora Gisette Seferina na un okashon anterior.
No mester deskartá tampoko ku mester modernisá nos leinan pa krea sanshonnan pa kastigá esnan ku ta shusha Kòrsou. Shusha Kòrsou lo tin reperkushonnan doloroso na miembronan ku nos bou di kondishonnan klimatológiko ferfelu ta shusha na sitionan públiko, den mondi, na playanan etcetera.
Durante e programa Bario pa Bario tantu dòkter Yves “Payo” Schoop komo mr. Curt Belfor a amplia riba e punto di produsí nos propio kuminda debí na desasternan natural ku por oumentá. Kòrsou no por stens sin mas riba importashon di kuminda for di paisnan ku tin e kustumber di ta full den produkshon pa eksportá. Orkan, teremoto, inundashon, tur ta fenómenonan ku lo bira mas severo i peligroso. No ta sigur tampoko ku Kòrsou lo por sigui konsiderá su mes pafó di e hurricane-belt.
Climate Change ta un menasa serio pa mundu hinter i mester sigui loke ta pasa pafó di nos fronteranan, pero nos mes tambe mester desplegá un papel muchu mas aktivo i responsabel. Dr. “Payo” Schoop a sigui enfatisá aspektonan manera salú i a indiká ku na un otro okashon e lo sòru pa den programa Bario pa Bario kompartí muchu mas sugerensia i rekomendashon pa nos hendenan sa kon atendé nan salú di forma ku ta kuadra. Na e momento aki dòkter Payo Schoop a trese padilanti pa tur siudadano sa di pèrkurá pa tur dia kunsumí sufisiente awa, komo tal e dòkter a duna komo sugerensia pa kada ken saliendo for di su peso, pero parti esei den 10 pa yega na e kantidat di liter di awa ku mester konsumí tur dia. Por ehèmpel un persona ku ta pisa 70 kilo mester bebe 7 bia ¼ liter di awa, aplikando e fórmula 70 : 10 = 7 multipliká ku ¼.